Покистонда уюштирилган қўпорувчиликда икки нафар Хитой фуқароси ҳалок бўлди.
Хитойнинг Покистондаги элчихонаси баёнот беришича, Карачи шаҳрида амалга оширилган террор ҳаракати натижасида Хитой фуқароларидан икки нафари ҳалок бўлган, яна бир инсон жароҳат олган.
Портлаш Жинна халқаро аэропорти яқинида уюштирилгани айтилмоқда.
Якшанба оқшоми Хитойнинг “Port Qasim Electric Power Company” энергетика компанияси ходимлари кетаётган машиналар карвонига ҳужум қилинган.
Хабарда таъкидланишича, элчихона ва консуллик ҳалок бўлганларнинг яқинларига ҳамдардлик билдириб, мудҳиш қўпорувчиликни кескин қоралаган.
Дастлабки маълумотга кўра, ёнилғи ташувчи автомобиль портлатилган. Натижада яқин атрофдаги машиналар ёна бошлаган. Ҳукумат тахминича, қўлбола портловчи қурилма ишга туширилган.