Ўзбекистон Республикаси Вазирлар Маҳкамаси ҳузуридаги “Ўзэнергоинспекция” томонидан ҳудудлардаги подстанциялар ва трансформатор пунктларидаги контактлар ва болтли бирикмаларида пайдо бўлаётган қизишларни аниқлаш бўйича тепловизор кўриклари амалга оширилмоқда.

Унда аниқланишича, 185 та подстанциядаги электр қурилмаларнинг 490 тасида меъёридан ортиқ қизиш ҳолатлари кузатилган. Мисол учун, Беруний туманидаги 110/35/6 кВли “Шаббаз” подстанциянинг электр қурилмалари тепловизор билан ўлчанганда контактлардаги ҳарорати 207ºC ни ташкил этган. Бу кўрсаткич меъёрий кўрсаткичдан ўта юқори ҳисобланади.

Шунингдек, Қашқадарё вилоятидаги 220/110 / 35/6 кВли “Қарши” подстанциянинг электр қурилмалари тепловизор билан ўлчанганда контактлардаги ҳарорат меъёридан 58ºC юқори ҳолатни ташкил этган.

Ушбу аниқланган камчиликлар бўйича 52 та подстанциядаги электр қурилмаларнинг 138 тасида меъёридан ортиқ қизиш ҳолатлари бартараф этилди.

“Ўзэнергоинспекция” ахборот хизматининг маълум қилишича, мазкур ҳолатлар бўйича маълумотномалар расмийлаштирилиб, инспекция томонидан тизим корхоналарига тегишли кўрсатмалар берилган ва унинг бажарилиши назоратга олинган.

Н.Зиёдуллаева тайёрлади, ЎзА