Бугунги кунда банк пластик карточкаларидан пул маблағларини ўғрилик йўли билан талон-торож қилиш ҳолатлари кўпайиб бормоқда.

 Бу борада 2020 йилда ички ишлар органларига 965 та, 2021 йилда 1 минг 601 та мурожаат келиб тушган.   
 
Олий Мажлис Қонунчилик палатасининг бугунги мажлисида иккинчи ўқишда моддама-модда муҳокама қилинган “Ўзбекистон Республикасининг Жиноят кодексига ўзгартиш ва қўшимчалар киритиш ҳақида”ги қонун лойиҳаси ана шундай жиноятларга нисбатан жазо чораларини кучайтириш назарда тутилган.   
 
Яъни, ахборот технологияларидан ёки электрон тўлов воситаси ёхуд масофавий хизмат кўрсатиш тизимидан фойдаланиб содир этилган фирибгарлик жинояти учун жавобгарликни Жиноят кодекси 168-моддасининг учинчи қисмига оғирлаштирувчи ҳолат сифатида киритиш назарда тутилмоқда.

Шунингдек, ахборот тизимига рухсатсиз кириб ёки электрон тўлов воситаси ёхуд масофавий хизмат кўрсатиш тизимидан фойдаланиб содир этилган ўғирлик жинояти учун жавобгарликни Жиноят кодекси 169-моддасининг учинчи қисмига оғирлаштирувчи ҳолат сифатида киритиш белгиланмоқда.  
 
Қонун лойиҳаси қизғин муҳокамаларга сабаб бўлди. Депутатларнинг фикрича, унинг қабул қилиниши жисмоний ва юридик шахсларнинг электрон пул маблағларини яширин равишда талон-торож қилишнинг олдини олишга, ушбу турдаги жиноятларни квалификация қилишда аниқ норма белгиланишига хизмат қилади.   
 
Муҳокамалардан сўнг қонун лойиҳаси қабул қилинди.   

М.Комилова, ЎзА