Пәкістанның солтүстік-батысындағы Хайбер-Пахтунхва провинциясында екі қарсы топ арасындағы атыс салдарынан кемінде 16 адам қаза тауып, бірнеше адам жараланды.

Синьхуа агенттігінің хабарлауынша, көмір шахтасында екі топ арасында жанжал шығып, нәтижесінде 16 адам қаза тауып, тағы төрт адам жарақат алған.

Полицияның дерегінше, жергілікті тайпалық сот соғысушы тараптарды татуластыру үшін бірнеше кездесулер өткізген. Алайда топ мүшелері көмір шахтасында жұмыс істеп жатқан кезде қақтығысқа ұшыраған.

Хабарда айтылуынша, оқиға орнына дереу полиция мен құтқарушылар жетіп, зардап шеккендерді жақын маңдағы ауруханаға жеткізген.

Полиция қылмыстық іс қозғап, тергеу амалдарын бастады. Құқық қорғау органдары даулы көмір шахтасын бақылауға алып, полиция атыс болғаннан кейін қылмыскерлердің кейбірінің оқиға орнынан қашып кеткенін және іздеуде жүргені айтылады хабарламада.