Пәкістанда толассыз муссон жаңбырлары салдарынан қаза тапқандар саны 72 адамға жетті.

Бұл туралы елдің Табиғи апаттарды басқару ұлттық агенттігі (NDMA) ресми мәлімдеме жасады.

Агенттік дерегіне сәйкес, Хайбер-Пахтунхва, Шығыс Пенджаб, Синд және Белуджистан провинцияларында жауын-шашын әлі де жалғасуда. 130-дан астам адам түрлі дене жарақатын алған. Жауын-шашын көлемі алдағы күндері тағы артуы мүмкін.

Осыған байланысты NDMA жергілікті билік органдарын жоғары дайындық жағдайына көшуге шақырған.

Айта кетейік, Пәкістанда шілде мен қыркүйек аралығы — дәстүрлі муссон маусымы. Бұл кезеңде болатын нөсер жауындар жыл сайын жүздеген адамның өмірін қиып, ел экономикасына айтарлықтай материалдық залал келтіреді.