Пискент туманида пиллачилик тобора ривожланиб бормоқда. Ипак эса табиий тоза ва экспортбоп маҳсулотдир. Жорий йилда ҳудуд пиллакорлари жами 2840 қути қурт уруғи парвариш қилмоқда.

Режа бўйича 168 тонна хомашё олиш режалаштирилган. Айни вақтда улар томонидан Тошкент вилоятида биринчилардан бўлиб йилнинг илк ҳосили йиғиштирилмоқда. 

Хусусан, Муротали маҳалласида яшовчи Маҳлиё Абдумаликова хонадони пиллачилик билан кўп йиллардан бери шуғулланади. Ҳозир бу оила етиштирган пилла ҳосилини йиғиш жараёнларини бошлаб юборишган. Туманда энг илғор пиллакорлар сафида турувчи Маҳлиё опа 2 қути пилла олиб, қайнонаси билан биргаликда ипак қуртини парваришлаган. Унинг 60 ёшдан ошган қайнонаси Шаҳринисо ая ҳам пиллачилик сирларини фарзандларига ўргатади. 

— Қоп-қора заррадан оппоқ товланган ипакка айлангунича қуртнинг бари феъл-атвори ёд бўлиб кетган,--дейди илғор пиллакор Маҳлиё Абдумаликова. — Қўни-қўшни, қариндошлар баҳорнинг иликузилди вақтида пилла боқамиз. Бир ойгина вақт ичида рўзғоримизга яхшигина фойда, ҳам уйда бўш ўтирмасдан иш билан банд бўламиз. 

Шунингдек, Култепа маҳалласида яшовчи Отамурод Холиқов тажрибали деҳқон ва пиллакор. Бу йил у 3 қути пилла қурти боқиб, 171 килограмм пилла маҳсулотини етиштиришни режалаштирган. 

3 нафар фарзанд ва 5 набиранинг суюкли бобоси бўлган қаҳрамонимиз хонадонининг 8 сотих томорқа ерида картошка эккан. Бир йилда оила шу жойдан уч маротаба ҳосил олади. Шунингдек, Отамурод ота бу билан чекланмай асаларичилик ва чорвачилик билан ҳам шуғулланади. 

Умуман олганда, жорий йил Пискентда пилла мавсуми пухта тайёргарлик асосида бошланди. "Агропилла" масъулияти чекланган жамияти мутахассислари томонидан жойлардаги инкубаторийларда ипак қурти уруғларини жонлантириш ишлари белгиланган тартибда амалга оширилди. Ўтган давр мобайнида ҳар бир касаначилар учун зарур шароит қилинди. Мақсад пиллакорлар меҳнати самарали бўлсин. 

А. Мусаев, ЎзА мухбири