Ипакчилик ва жун саноатини ривожлантириш қўмитасида АҚШ давлат департаментининг одам савдосига қарши кураш ва назорат қилиш бошқармаси вакиллари Гаролд Янсен, Патрик Рид, Чейн Корп ҳамда АҚШнинг Ўзбекистондаги элчихонаси сиёсий ва иқтисодий масалалар бўйича вакили Сара Беккер билан учрашув бўлиб ўтди.

Меҳмонлар ипакчилик соҳасида мажбурий меҳнат ва болалар меҳнатидан фойдаланиш даражасини аниқлаш мақсадида ташриф буюрди.

Ипакчилик ва жун саноатини ривожлантириш қўмитаси ҳамда “Ўзбекипаксаноат” уюшмаси бошқарув раиси Баҳром Шарипов Ўзбекистонда ипакчилик тармоғида 1 миллион 200 мингдан ортиқ фуқаро ишлаши ва бу кўрсаткичнинг 70 фоизини хотин-қизлар ташкил этишини таъкидлади. Ўзбек ипакчилик секторида мажбурий меҳнат ва болалар меҳнатидан бундан бир неча йиллар аввал воз кечилганини қайд этди.

Маълумки, бугунги кунда ўзбек ипакчилиги маҳсулотлари жаҳон бозори конъюнктурасида ўз ўрнини топиб улгурди. Пиллачиликнинг бу даражага чиқишида “Ўзбекипаксаноат” уюшмасининг ташкил этилгани катта аҳамиятга эга.

Бугунги кунда пиллачилик тармоғида барча шароит ва имкониятлар яратилган. Жумладан, жорий йил 1 январдан бошлаб хонадонларда пилла етиштирувчи жисмоний шахсларга етиштириладиган ҳўл пилла ҳосилининг ҳар бир килограмми учун тўланадига пулга қўшимча яна 5 минг сўм миқдорида республика бюджети ҳисобидан субсидия ажратилмоқда.

Пилла етиштириш билан шуғулланувчи касаначиларни қонун ҳужжатларида тасдиқланган тўлиқ бир мавсум ишланган даврларида уларга пенсия тайинлаш учун бир йил меҳнат стажи белгиланган. Шунингдек, қўмита ва уюшма томонидан энг илғор касаначи, пиллакорлар ҳар байрамда рағбатлантирилиб борилади.

“Яшил макон” умуммиллий лойиҳаси доирасида ҳар бир вилоят ва туман ҳудудларида яратилаётган тутзорлар ораларига касаначилар мавсумий экинлар экиб фойдасини ўзларига олишлари учун имкониятлар ҳам яратилган.

Шу сабаб бир йил пилла боқиб кўрган касаначи ҳар йили ўзи хоҳлаб пилла парваришлайди. Бундан кўриниб турибдики, пиллачилик тармоғида мажбурий меҳнат ёки болалар меҳнатига ҳеч қандай эҳтиёж йўқ.

Шунингдек, меҳмонлар “Ўзбекипаксаноат” уюшмаси тизимидаги кластерлар фаолияти, уюшма ташкил топгандан буён бунёд этилган 22 та тутчилик хўжаликлари ҳамда ипак хомашёсидан ишлаб чиқарилган маҳсулотлар билан танишди.

Меҳмонлар ташриф доирасида Самарқандда янги очилаётган пиллачилик корхоналари фаолияти билан танишади.

<iframe width="650" height="420" src="https://www.youtube.com/embed/zUnTHOgcXEI" title="Пиллачилик соҳасида мажбурий меҳнатга эҳтиёж йўқ" frameborder="0" allow="accelerometer; autoplay; clipboard-write; encrypted-media; gyroscope; picture-in-picture" allowfullscreen></iframe>

Гулноза Бобоева, Дониёр Ёқубов (видео) ЎзА.