Ипакчилик ва жун саноатини ривожлантириш қўмитаси ва «Ўзбекипаксаноат» уюшмаси раиси Баҳром Шарипов раҳбарлигида Бухоро, Наманган, Сурхондарё вилоятида фаолият олиб бурувчи ҳудудий «Агропилла» МЧЖ ва пиллани қайта ишлаш корхоналари, ипак қурти уруғчилик корхонаси раҳбарлари иштирокида амалий мулоқот бўлиб ўтди.

Йиғилишда 2022 йил пилла етиштириш мавсумида амалга оширилган ишлар, белгиланган экспорт прогноз кўрсаткичларининг таъминланиши борасида олиб борилаётган ишлар таҳлили, пиллакорларга субсидия маблағларининг ўрнатилган тартибда қонуний берилиши, «Яшил йиллик» умуммиллий лойиҳаси доирасида тут кўчатларининг экилиши бўйича амалга оширилаётган ишлар, шунингдек тўлов интизоми масалалари ҳам муҳокама қилинди.

2022 йилда қайта ишлаш лойиҳаларининг фойдаланишга топширилиши бўйича пиллакорларга субсидия маблағларининг ўрнатилган тартибда қонуний берилиши хусусида фикр-мулоҳазалар билдирилди.

Маълумотларга кўра, бу йил Республикамиз бўйича тутзорлар, тут хўжаликлари, пиллани қайта ишлаш корхоналари ва аҳоли хонадонларига жами 54 минг гектардан ортиқ ерга 400 мингга яқин тут кўчатлари экилиши кўзда тутилган.

Жорий йилги пилла мавсумида эса 26 минг 572 тонна пилла етиштирилиши режалаштирилган.

Бу каби мулоқотлар вилоятлар кесимида ҳам ўтказилиши кўзда тутилган бўлиб, ҳар бир вилоят вакили кунлар кетма-кетлигида тузилган жадвал асосида йиғилишни ташкил этишлари айтиб ўтилди.

Гулноза Бобоева, ЎзА