Пекинда давом этаётган қишки Олимпия ўйинларида иштирок этаётган ҳамюртимиз Комилжон Тўхтаев 16 февраль куни слалом дастуридаги мусобақаларда баҳсларга киришади.

15 февраль куни ҳамюртимиз италиялик мураббийи Маттиа Жианесси билан сўнгги тайёргарликни ўтказишди.

Машғулотлар якунида Комилжон Тўхтаев ва унинг мураббийи Маттиа Жианесси Миллий олимпия қўмитаси матбуот хизматига Пекин-2022 баҳслари ҳақида сўзлаб беришди.

- Комилжоннинг Пекин олимпиадасидаги гигант слаломдаги чиқишидан кўнглим тўлди. 13 февраль куни ўтган ўта шиддатли ва ноқўлай об-ҳаво шароитидаги баҳсларда 90 нафардан ошиқ иштирокчи орасида Тўхтаев кучли 30 таликдан жой олди. Бу натижаси билан у Осиё чанғичилари орасида биринчи бўлди. Албатта, европалик кучли спортчилар билан олимпиадада мусобақада олиб боришнинг ўзи бўлмади. Ишонаманки, 16 февралда олимпия ўйинларининг слалом баҳсларида у энг яхши кўрсаткичга эришади, - деди италиялик мураббий.

Ўз навбатида, Комилжон Тўхтаев қишки олимпиаданинг энг мураккаб мусобақаси гигант слалом ортда қолганини, дастурни муваффақиятли якунлаганлар орасида борлигини ва бу унга янада ишонч бағишлаётганини таъкидлаб, “бу энергия менга слаломда бироз таваккалчилик билан тезликни оширишга чорлаяпти. Насиб қилса, олимпиаданинг мен учун сўнгги дастури бўлган баҳсни кўнгилдагидек ўтказаман”, дея ишонч билдирди.

Ортда қолган қишки Олимпия ўйинларининг навбатдаги кун баҳслари сарҳисобига биноан ҳамон Норвегия пешқадамлик қилмоқда. Улар 15 февраль кунги дастурдан ўрин олган чанғи иккикураши, конькида югуриш ва биатлон баҳсларидаги олтин медаллари билан умумжамоадаги етакчиликни янада мустаҳкамлаб олишди. Германия ва АҚШ термалари кейинги совринли қаторларни банд этиб турибди.

16 февраль куни оқ олимпиада иштирокчилари 6 та спорт турининг 8 та йўналишидаги медаллар учун муросасисиз баҳсларда иштирок этишади. Шунингдек, учта йўналишда саралаш мусобақалари бўлиб ўтади.

Эслатиб ўтамиз, Комилжон Тўхтаев 16 февраль куни Тошкент вақти билан соат 07:15 да биринчи стартини амалга оширади. Иккинчи бор эса соат 10:45 да трассага чиқиши белгиланган.

ЎзА