Юртимизда 1 октябрь – “Устоз ва мураббийлар куни” умумхалқ байрами сифатида кенг нишонланади. Бу сана – ёш авлодга таълим бериб, уларни баркамол инсон қилиб тарбиялаш йўлида фидокорона хизмат қилаётган азиз устозларимизга бўлган юксак эҳтиром ва чуқур миннатдорчилик ифодасидир.

Ана шундай қутлуғ кун муносабати билан Ўзбек Миллий академик драма театрида Тошкент давлат техника университети профессор-ўқитувчилари учун тантанали тадбир ташкил этилди.

Маросимда университет ректори, академик Садриддин Тўробжонов, Тошкент шаҳар ҳокими ўринбосари Шаҳноза Султонова, профессор-ўқитувчилар ва талаба-ёшлар иштирок этди.

Университет ректори устозларнинг фидокорона меҳнатини юксак қадрлаб, ёш авлодга билим бериш ва тарбия беришдаги улкан ҳиссасини алоҳида таъкидлади. Шу муносабат билан бир гуруҳ фидойи педагогларга “Олий таълим аълочиси” кўкрак нишонлари топширилди.

Тадбир ранг-баранг мусиқий чиқишларга бой бўлди. Санъаткорлар ва театр актёрлари томонидан ижро этилган куй-қўшиқлар, саҳна кўринишлари ва бадиий дастурлар устозларга байрамона кайфият улашди.

Устозларимизнинг заҳматлари юрт келажагининг порлоқ бўлишига хизмат қилади. Шу боис уларнинг меҳнатини қадрлаш, уларга эҳтиром кўрсатиш барчамизнинг инсоний бурчимиздир.

<iframe width="650" height="420" src="https://www.youtube.com/embed/1hESv86GfNg" title="Pedagoglarga “Oliy ta’lim a’lochisi” ko‘krak nishoni topshirildi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Беҳруз Худойбердиев, Дониёр Ёқубов, Анвархўжа Аҳмедов, ЎзА