Жиззах вилояти Пахтакор туманидаги 14-сонли болалар мусиқа ва санъат мактабида «Турон» мактаб театри республика танловининг туман босқичи бўлиб ўтди.

Ёш авлодни ватанпарварлик руҳида тарбиялаш, уларнинг саҳна маданияти ва нотиқлик маҳоратини ривожлантириш мақсадида ташкил этилган танловда тумандаги 19 та умумтаълим мактабидан 152 нафардан ортиқ ўқувчи иштирок этди. Иштирокчилар белгиланган икки шарт асосида театрлаштирилган саҳна кўринишлари, бадиий чиқишлар ҳамда миллий куй-қўшиқлар ижроси орқали ўз маҳоратини намоён этдилар.

— Ушбу танлов ёшларимизнинг маънавий дунёсини бойитиш, уларда миллий тарих ва адабиётимизга бўлган қизиқишни оширишда муҳим аҳамият касб этади, - дейди Республика Маънавият ва маърифат маркази Пахтакор туман бўлими раҳбари Илҳом Холиқов. — Саҳна чиқишларида ўқувчиларнинг актёрлик маҳорати билан бирга юксак маънавий қарашлари ҳам яққол намоён бўлди. Мақсадимиз — театр санъати орқали ёшларда эзгу инсоний фазилатларни шакллантириш ва иқтидорли ўқувчиларни қўллаб-қувватлаш.

[gallery-27980]

— Танловга узоқ вақт давомида жиддий тайёргарлик кўрдик, - дейди иштирокчи Гуласал Анорбоева. — Саҳнадаги образлар орқали тенгдошларимизга эзгулик ва ватанпарварлик ғояларини етказишга ҳаракат қилдик. Бундай танловлар ёшлар учун ўз иқтидорини намоён этиш ва тажриба орттиришда муҳим майдон ҳисобланади.

Ҳакамлар ҳайъати иштирокчиларнинг саҳна маданияти, ижодий ёндашуви ва жамоавий уйғунлигини баҳолади. Қизғин кечган баҳслар натижасига кўра, 7-умумтаълим мактаби жамоаси биринчи ўринни, 11-мактаб жамоаси иккинчи ва 2-мактаб жамоаси учинчи ўринни эгаллади.

Танлов якунида ғолиб жамоалар танловнинг кейинги босқичида иштирок этиш ҳуқуқини қўлга киритди.

<iframe width="650" height="420" src="https://www.youtube.com/embed/HMk3yVrGWKg" title="Paxtakorda «Turon» maktab teatri tanlovining tuman bosqichi o`tkazildi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

ЎзА фотомухбири

Жамшид ЁРБЕКОВ олган сурат ва видео