Шу кунларда Тошкент вилояти ҳокимлиги масъуллари, қишлоқ ва сув хўжалиги соҳалари вакилларидан иборат делегация хизмат сафари билан Хитой Халқ Республикасида бўлиб турибди.

Сафар дастурига кўра делегация аъзолари Хитой пахтачилик тармоғи ютуқлари, тўпланган тажрибалар билан яқиндан танишиш, бир қатор етакчи пахта тозалаш ва уруғчиликка ихтисослашган компания вакиллари билан юзма-юз музокаралар ўтказишни режалаштирган. 

Хусусан, Шинжон туманидаги “HillTide” корхонаси билан ҳамкорликда пахтанинг “Xinluzhong-73” ва “Hongtai-6636” навларининг Р1 тоифали уруғлик олиб келиш мақсад қилинган. Қайд этиш лозимки, Тошкент вилоятида 2026 йил ҳосили учун жами 49 минг 880 гектар майдонга (шундан 27 минг 950 гектар хорижий нав) уруғлик чигит талаб этилади. 

Бугунги кунгача Хитой Халқ Республикаси билан Тошкент вилояти ўртасида пахтанинг супер элита авлодидан элита уруғлик харид қилиш бўйича музокаралар олиб борилиб, дастлабки келишувларга эришилган. Сафар дастури доирасида делегация аъзолари Хитой аграр тармоғида қўлга киритилган ютуқлар ва илғор тажрибалар билан яқиндан танишди. 

Шунингдек, уруғчилик ва агрокимё йўналишида фаолият юритаётган етакчи компаниялар вакиллари билан қатор музокаралар ўтказилмоқда. Хусусан, Хитой Халқ Республикасининг Нантун шаҳрида жойлашган “Jiangshan Chemical” корхонасида амалий учрашув бўлиб ўтди. Унда гербицидлар, оқ пашша ва кўсак қурти каби зараркунандалар, шунингдек, бегона ўтларга қарши курашишда қўлланиладиган кимёвий воситалар ҳамда минерал ўғитларни етказиб бериш масалалари муҳокама қилинди. 

Учрашув якунида мазкур йўналишларда ўзаро манфаатли ҳамкорлик алоқаларини йўлга қўйиш бўйича келишувларга эришилди. Шу билан бирга, делегация аъзолари пахтани қайта ишлаш ускуналари ишлаб чиқаришга ихтисослашган “HAYSHUN GROUP” компанияси раҳбарияти билан музокаралар ўтказди. Унда замонавий пахтани қайта ишлаш ускуналари ва технологияларини Тошкент вилоятидаги пахта-тўқимачилик кластерлари ҳамда кичик хусусий уруғчилик корхоналари фаолиятига жорий этиш масалалари муҳокама қилинди. 

Шунингдек, мулоқотда сифатли тола, линт ва бошқа қимматли пахта хомашёларини қайта ишлаш ҳажмларини ошириш, ишлаб чиқариш самарадорлигини юксалтириш ва ўзаро манфаатли ҳамкорликни йўлга қўйиш истиқболлари юзасидан ҳам фикр алмашилди. 

А.Мусаев, ЎзА.