Сўнгги йилларда глобал иқлим ўзгариши натижасида кузатилаётган сув танқислигини юмшатиш, шунингдек соҳага хорижий давлатларнинг илғор тажрибаларини кенг жорий қилиш ва инвестиция маблағларини жалб қилиш бўйича тизимли ишлар амалга оширилмоқда.

Хусусан, Қишлоқ хўжалиги вазирининг Туркия тадбиркорлари билан ўтказган учрашувида қишлоқ хўжалиги экин майдонларида томчилатиб суғориш технологиясининг такомиллаштирилган тизими “Tarteksan” технологиясини Ўзбекистонда жорий қилиш бўйича музокаралар олиб борилган эди. Учрашув якуни бўйича мазкур технологияни компаниянинг инвестицион маблағлари ҳисобига мамлакатимизнинг маълум бир ҳудудида жорий этиш, бунда эришилган самарадорлик натижасига кўра республика бўйлаб кенг жорий этишга келишилган. 

Шундан келиб чиқиб, Туркиянинг тегишли компанияси билан “Tarteksan” технологиясини синовдан ўтказиш бўйича Тошкент вилояти Бўка туманидаги “Шукрулло ясмина агро” фермер хўжалигининг 12 гектар пахта майдонида тажриба участкаси ташкил қилинди. 

Қайд этиш лозимки, “Tarteksan” – суғориш тизими қишлоқ хўжалиги экинларини етиштириш учун талаб этиладиган ўғит тури, миқдори ҳамда сув ресурслари меъёрини тупроқ таркибидан келиб чиқиб, инсон омилисиз автоматик аниқлаш имконини берувчи қурилма ҳисобланади. 

Ушбу тажриба участкасида экилган ғўзани парваришлаш учун талаб этиладиган ҳар хил турдаги минерал ўғитлар ва сув ресурслари тупроқнинг ҳолатидан келиб чиқиб, автоматлаштирилган тизим орқали бериб борилган. Ушбу жараён тўлиқ Туркия давлатидан таклиф этилган мутахассислар томонидан амалга оширилиб, агроном хизматлари кўрсатиб борилган. Бугунги кунда ғўзанинг ривожланиши жудаям яхши ҳолатда бўлиб, бир тўп ғўзада ўртача 30-32 та кўсак мавжуд. 

Соҳа вакилларининг таъкидлашича, туркиялик мутахассислар тупроқ таркибини махсус қурилма орқали атиги 15 сонияда аниқлаб, унга керакли бўлган озуқа миқдорини юбормоқда. Бу эса, биринчи навбатда иқтисодий самарадорликни таъминлайди. Шунингдек, ғўзаларга керакли миқдорда ўғит юборилишида муҳим аҳамият касб этади. 

Ушбу тажриба участкасини ташкил қилишдан мақсад мавжуд сув ресурсларидан самарали фойдаланишда замонавий суғориш технологияларини кенг жалб қилиш орқали пахта майдонларида ҳосилдорликни оширишга (70-80 с/га) эришишдан иборат. 

Агар тажриба участкасида синовдан ўтказилаётган “Tarteksan” томчилатиб суғориш технологиясида самарали натижага эришилса, келгусида ушбу технологияни мамлакатимизда кенг татбиқ қилиш режалаштирилган. 

Муҳайё Тошқораева, ЎзА