Пойтахтимизда “Саноат паррандачилигида паррандаларнинг юқумли касалликлари диагностикаси ва олдини олишнинг долзарб масалалалари” мавзусида халқаро илмий-амалий конференция бўлиб ўтди.

Ветеринария ва чорвачиликни ривожлантириш давлат қўмитаси ҳамда Россиянинг “Бутунроссия ҳайвонлар касалликлари илмий-тадқиқот институти” ҳамкорлигида ташкил этилган тадбирда парранда касалликлари бўйича эпизоотик вазият, товуқларнинг юқумли бронхити (ИБК) серотипларининг хилма-хиллиги, парранда касалликларига қарши кураш чора-тадбирлари атрофлича муҳокама қилинади.

Паст патогенли парранда гриппи ва унга қарши кураш борасида амалга оширилаётган комплекс чора-тадбирлар, марек касаллиги, унинг эпизоотологияси ва профилактикаси каби муҳим масалалар ҳам таҳлил қилинди.

Конференцияда парранда касалликларига қарши ветеринария препаратларининг қўлланилиши бўйича олимлар томонидан зарур таклиф ҳамда тавсиялар берилди. Шунингдек, ветеринария соҳаси учун зарур бўлган замонавий жиҳоз ва ускуналар ҳамда диагностикумлар кўргазмаси намойиш этилди.

Маълумот ўрнида айтиш лозимки, айни пайтда мамлакатимизда 47 та наслчиликка ихтисослашган паррандачилик хўжалиги фаолият юритаётган бўлса, шундан 7 таси тухум, 40 таси гўшт йўналишида фаолият юритиб келмоқда.  

Муҳайё Тошқораева,

ЎзА