Давлатимиз раҳбарининг 2018 йил 13 ноябрдаги «Паррандачиликни янада ривожлантириш бўйича қўшимча чора-тадбирлар тўғрисида»ги қарори эса илғор хорижий давлатларнинг тажрибасини ўрганган ҳолда ҳудудларда парранда етиштиришни такомиллаштириш ва ушбу соҳада фаолият юритаётган тадбиркорларга кўплаб имтиёзлар яратиш имконини берди.

Навоий вилояти Хатирчи туманидаги «Муҳаммад Али қувончи» масъулияти чекланган жамияти 2013 йилда ташкил этилган бўлиб, транспорт воситаларига ёқилғи қуйишга ихтисослашган эди. 2017 йилнинг охирида жамият таркибидаги 3 гектар майдонда паррандачилик корхонаси барпо қилинди.

70 минг парранда парваришланаётган корхонада айни кунда 50 нафарга яқин ишчи-ходим меҳнат қилмоқда. Лойиҳанинг умумий қиймати 5,5 миллиард сўмдан иборат бўлиб, маҳсулот ички бозордан ташқари Тошкент ва Самарқанд бозорларига етказиб берилмоқда. Ҳозирда корхонадаги паррандаларга инфекция юқмаслиги учун вақтида дезинфекция қилиниб, эмлаш ишлари олиб бориляпти.