Бугунги кунда юртимиз паррандачилик соҳасида генетик ва наслли материаллар ишлаб чиқаришни маҳаллийлаштириш орқали ички эҳтиёжни таъминлаш ҳамда экспорт салоҳиятини оширишга қаратилган имкониятлар етарлича.
Шу муносабат билан, Ветеринария ва чорвачиликни ривожлантириш қўмитаси ва “Паррандасаноат” уюшмаси ҳамкорликда дунёда етакчи бўлган “Aviagen group” генетик компанияси вакиллари билан музокара олиб бормоқда. Унда ушбу компания томонидан Жиззах вилояти Зомин туманида 40 млн долларлик лойиҳа муҳокама қилинди. Мазкур учрашувда гўшт йўналишида “ROSS-308” кроссига мансуб паррандаларнинг I-тартибли репродуктор наслчилик корхонасини ташкил этишга доир масалалар кўриб чиқилди.
Учрашувда сўз олган қўмита раиси томонидан бугунги кунда маҳаллий паррандачилик хўжаликларининг 80 фоиздан ортиғи “ROSS-308” наслидан фойдаланиши, бу эса мамлакатда парранда гўшти ишлаб чиқариш салоҳиятини янада оширишда муҳим омил бўлиб хизмат қилиши таъкидланди.
Айтиш керакки, “ROSS-308” насли жаҳон миқёсида парранда генетикасида етакчи бўлиб, селекция дастурларига кўра юқори ўсиш суръати, озуқа-ем сарфининг камлиги ва юқори маҳсулдорлиги билан бошқа парранда зотларидан ажралиб туради. “Aviagen group” компанияси билан ҳамкорлик нафақат генетик салоҳиятни ошириш, балки парранда гўшти етиштириш таннархини пасайтириш, қўшни давлатларга экспорт қилиш имкониятларини кенгайтириш ва озуқа ресурсларидан тежамли фойдаланишга хизмат қилади. Мазкур компания билан учрашув – бу оддий ташриф эмас, балки мамлакатда илғор генетик технологияларни жорий этиш, эпизоотик барқарорликни мустаҳкамлаш ва ветеринар хавфсизликни интеграция қилиш чораларини кучайтириш бўйича стратегик қадамдир.
<iframe width="650" height="420" src="https://www.youtube.com/embed/27LynOPcDkM" title="Parrandachilik genetikasida yangi bosqich boshlanmoqda" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Санжар Тошпўлатов, Улуғбек Тўхтаев, ЎзА