Бу ҳақда Ветеринария ва чорвачиликни ривожлантириш қўмитаси раиси Баҳром Норқобилов ва Нидерландиянинг Hendrix genetics компанияси раҳбари Пелаё Казановас ўртасидаги мулоқотда маълум қилинди.

Айтиш мумкинки, паррандачилик генетикаси мамлакатимизда тамомила янги йўналиш бўлиб, мазкур йўналишда бирорта йирик лойиҳа ёки дастур йўлга қўйилмаган.

Ушбу хорижий компания билан олиб борилган музокаралар натижасида ўтган йили паррандаларнинг тухум йўналишидаги биринчи тартибли ота-она галасини ташкил этиш лойиҳаси устида ишлар олиб борилди. Натижада ҳамкорликдаги “Қўшработ Ломанн парранда” лойиҳасини ишга тушириш маъқулланиб, лойиҳа тўлиқ қўллаб-қувватланди. Қўшработ, Оқдарё ва Самарқанд туманларидан 30 гектар ер майдони ажратиб берилиши белгиланди.

Эслатиб ўтамиз, компания Нидерландиянинг Боксмеер шаҳрида жойлашган. Йигирма йилдан буён товуқ, курка, яъни анъанавий паррандачилик, шунингдек лосос ва форель балиқларнинг юқори маҳсулдор наслини кўпайтириш билан шуғулланади.

Компаниянинг йигирма бешта давлатда филиаллари мавжуд.

Икром Аввалбоев, ЎзА