Өзбекстан Республикасының Президенті Шавкат Мирзиёев Парламентаралық одақтың 150 жылдық мерейтойлық ассамблеясын Өзбекстанда өткізу бастамасын білдірген еді.

Швейцарияның Женева қаласында Парламентаралық одақтың (ПО) Бас хатшысы Мартин Чунгонг пен Өзбекстан Сенатының Төрағасы Танзила Нарбаева арасында ПО-ның 150 жылдық мерейтойлық ассамблеясын 2025 жылы Өзбекстанда өткізу туралы келісімге қол қойылды.

Айта кету керек, Өзбекстанның белсенді және прагматикалық сыртқы саясатының арқасында еліміз әлемдік саясаттың орталықтарының біріне және жаһандық бастамалардың авторына айналып келе жатыр.

Өзбекстанның парламенті бұл үдеріске белсенді қатысуда. Атап айтқанда, ірі халықаралық парламенттік құрылымдардың толыққанды мүшесі ретінде беделді конференциялар өткізіп, маңызды ұсыныстар мен бастамаларды алға тартуда.

ПО-мен ынтымақтастықта Бұқара қаласында Тұрақты даму мақсаттары жөніндегі халықаралық парламенттік форумның сәтті өтуі және Ташкентте ПО-ға мүше мемлекеттер парламенттерінің әйел көшбасшыларының 14-ші саммиті соның жарқын мысалы болып табылады.

Әлемнің 180 елінің парламенттерінің басын қосатын бұл беделді құрылым өзінің жоғары органы ассамблеясын парламентаризм мен тұрақты дамудың оң тәжірибесі бар елдерде өткізеді. 

Ассамблеяның алғаш рет Орталық Азия өңірінде, Өзбекстанда өткізілуі Мемлекет басшысының жетекшілігінде Өзбекстанда демократиялық реформалар мен парламентаризмді дамыту жолындағы күш-жігердің әлемдік қоғамдастық мойындағанын растайды.

ПО-ның кезекті ассамблеясында парламенттер арасында өзара тәжірибе алмасу, Өзбекстан парламентінің қызметімен танысу жоспарланған.

Ассамблея 2030 стратегиясын жүзеге асыруға парламенттің қатысуын кеңейту, адам құқықтары, гендерлік теңдік, жастардың құқықтары мен мүмкіндіктерін кеңейту, климаттың өзгеруіне қарсы күресте парламенттік ынтымақтастық мәселелерін қарастыратын маңызды алаң болады.