Маълумки, мамлакатимизда коронавирусга қарши курашиш борасида кенг қамровли ишлар амалга оширилди. Жумладан, “Ўзбекистон Республикасида коронавирус инфекциясига қарши шошилинч чораларни кўриш” лойиҳасини амалга ошириш гуруҳи харажатларини қоплаш учун халқаро молия институтларидан жами 24 миллион 600 минг доллар маблағ жалб этилган.

Шунингдек, Президентимизнинг 2022 йил 28 январдаги тегишли фармонига асосан Лабораторияларни ташкил этиш бўйича лойиҳанинг техник-иқтисодий асосини ишлаб чиқиш ҳамда БМТнинг Лойиҳа хизматлари бошқармасини (UNOPS) лойиҳанинг техник-иқтисодий асосларини ишлаб чиқишга ва амалга оширишга жалб этиш белгиланган.  

2022 йилнинг 22 декабрида Халқаро молия институтларининг лойиҳанинг техник-иқтисодий асосларини ишлаб чиқиш ва амалга ошириш учун UNOPS ташкилотини жалб этиш бўйича ижобий хулосалари берилган ва 23 декабрда Ўзбекистон Республикаси Санитария-эпидемиологик осойишталик ва жамоат саломатлиги хизмати ва UNOPS ўртасида умумий қиймати 10,75 миллион  долларга тенг бўлган келишув шартномаси имзоланган.    

Олий Мажлис Қонунчилик палатасининг мажлисида “Ўзбекистон Республикасида коронавирус инфекциясига қарши шошилинч чораларни кўриш” лойиҳаси бўйича амалга оширилаётган ишлар натижадорлиги тўғрисида”ги масала юзасидан юборилган Қонунчилик палатасининг парламент сўровига соғлиқни сақлаш вазири А.Иноятовнинг жавоби кўриб чиқилар экан, юқоридагилар алоҳида қайд этилди.    

Шунингдек, парламент сўровида келтирилганидек, 2021 йил 1 октябрга қадар 1 000 та тез тиббий ёрдам махсус автотранспорт воситаларини харид қилиш чораларини кўриш, Осиё тараққиёт банки томонидан ажратиладиган кредит маблағларининг 35 миллион долларини тез тиббий ёрдам махсус автотранспорт воситаларининг хариди учун йўналтириш назарда тутилган.  

Ушбу имтиёзли кредит маблағлари ҳисобига 1 000 та “Volkswagen Caddy” тез тиббий ёрдам махсус автотранспорт воситаларини 2021 йил 1 октябрга қадар харид қилиш юзасидан зарур чораларни кўриш белгиланган. Бугунги кунга қадар “Sergeli Avtotexxizmat” МЧЖ (“Жиззах автомобиль заводи” МЧЖнинг тижорат вакили) билан тўғридан-тўғри тузилган шартномага асосан 110 та автотранспорт воситалари етказиб берилган.  

Мажлисда депутатлар парламент сўровига юборилган жавобни атрофлича муҳокама қилиб, уни маълумот учун қабул қилдилар.   

Муҳтарама Комилова, ЎзА