Россия – Украина
Франция ва Италиянинг қўшма лойиҳаси – ҳаво ҳужумидан мудофаа SAMP/T тизими Украинада қўлланмоқда, дея маълум қилди Президент Эммануэль Макрон.
Февраль ойида Париж ва Рим Украинага SAMP/T ускуналари етказиб беришга келишган эди. Мазкур тизим ердаги иншоотларни ҳаво ҳужумидан ҳимоя қилади, радио электрон тўлқин йўлини тўсади.
Германия Президенти Франк-Вальтер Штайнмайер Хитой Давлат кенгаши Бош вазири Ли Цян билан кўришди. Маълум бўлишича, Берлин Пекинни Украинада тинчликка эришиш учун Моквага таъсир ўтказишга чақирган.
Африка мамлакатлари тинчликка эришиш йўлини топиш мақсадида Россия ва Украина етакчилари билан алоқани давом эттиришдан тўхтамайди. Бу ҳақда Жанубий Африка Республикаси Президенти Сирил Рамафоса баёнот берди.
“Президентлар Владимир Путин ва Владимир Зеленский Африка миссиясининг биринчи учрашувидан кейин келгусида музокарани давом эттиришга рози”, деди у.
Украина етакчисининг турмуш ўртоғи Елена Зеленская Исроил Президенти Ицхак Герцог ва унинг аёли билан кўришди. Хонимнинг ўзи ижтимоий тармоқдаги саҳифасида шу ҳақда маълум қилди. Исроил ТИВ хабарида “учрашув нонушта дастурхони атрофида кечган”и айтилган.
Украинадаги зиддият масаласида ЕИ жиддий хатога йўл қўйди ва минтақа хавфсизлиги учун кутилмаган оқибат келтирадиган воқеага аралашиб қолди, деди Венгрия ташқи ишлар ва ташқи савдо алоқалари вазири Петер Сийярто. Унинг баёнотида, жумладан, шундай сўзлар бор:
– Салкам бир ярим йилдирки, Европа бу можарони тўхтата олмаяпти. Киевга қанча кўп қурол-аслаҳа келиб тушса, зиддият шунча узоқ вақт давом этади, одамлар қурбон бўлади.
Хитой ТИВ расмий вакили Мао Нин журналистлар билан учрашув чоғида ХХРнинг Украина хавфсизлиги учун кафолат беришга тайёрлигини тасдиқламади ёки рад ҳам этмади.
“Украина масаласида Хитой позицияси аниқ, биз тинч музокара йўли билан инқирозни сиёсий ҳал этиш йўлидаги саъй-ҳаракатни давом эттирамиз”, деди дипломат.
Украина ЕИга кириш бўйича музокара бошлаш учун етти шартдан иккитасини бажарди: ОАВ эркинлиги ва суд тизими ислоҳоти. Бу ҳақда “Reuters” агентлиги хабар берди.
– Украина Швеция каби НАТОга қўшилишни истайди, – деди Олий Рада раиси Руслан Стефанчук “Украинская правда” нашри мухбирига. – Финляндия НАТОнинг 31-аъзосига айланди, навбатда Швеция бор, биз 33-бўлиб Шимолий Атлантика альянсига киришни хоҳлаймиз.
Украина Президенти девони раҳбари Михаил Подоляк айтишича, НАТОга қўшилиш жараёни жуда қисқа, уч-саккиз ойдан ошмаслиги керак. Стефанчук баёнотига кўра, сайлов мамлакатдаги ҳарбий ҳолат тартиби тугагандан кейин ўтказилиши зарур.
– 7 миллиондан зиёд сайловчи хорижга чиқиб кетган, уларнинг овоз беришини ташкил қилиш мушкул, – деган раис. – Энг мақбул йўл сайловни мамлакатдаги вазият барқарорлашганда ўтказиш. Қонунчилик шуни тақозо этади.
Аброр ХОН, ЎзА