Белгісіз американдық коллекционер аукционда 6,65 миллион еуроға «Үлкен Джон» деп аталатын трицератопс динозаврдың қатқан сүйектерін сатып алды.

Париждегі Drouot аукцион үйінде өткен шарада, динозавр қаңқасы бастапқы бағадан 4 есе қымбат сатылды. Дегенмен бұл динозавр қаңқасы үшін төленетін рекордтық сома емес: бір ай бұрын Нью -Йоркте тираннозавр қаңқасы 31,8 миллион долларға сатылған еді.

Қаңқалары сатылған трицератопс қазіргі Оңтүстік Дакотада (АҚШ) 66 миллион жыл бұрын өмір сүрген дейді. Палеонтологтар алдымен динозавр сүйектерінің бір бөлігін анықтап, содан кейін бір жыл ішінде қаңқаның 60 пайызы, оның ішінде 2,6 футтық бас сүйегі табылды. «Үлкен Джон» қаңқасының ұзындығы 8 метр. Бұл ғылымға белгілі ірі трицератопс. Оның мүйізінің ұзындығы 1,1 метр, ені 30 см. Ол 16 тоннаға дейінгі қысымға төтеп бере алады.

Барлығы 200-ден астам сүйектен тұратын жануар скелетінің жалпы салмағы 700 кг-нан асады.