Бүгін, 22 шілде күні Франция астанасы Париж қаласында Өзбекстан Республикасы Президентінің жүлдесі үшін өтетін халықаралық күрес турнирі басталды.

Кеше, жүлде қоры 30 мың еуроны құрайтын бұл халықаралық турнир қарсаңында арнайы баспасөз мәслихаты ұйымдастырылды.

Онда Халықаралық күрес қауымдастығы, Еуропа күрес конфедерациясы, сондай-ақ Франция мен Өзбекстан күрес федерацияларының өкілдері мен төрешілер қатысып, турнирдің маңызы туралы пікір алмасты.

Баспасөз мәслихатында Өзбекстан күрес федерациясы төрағасының спорт ісі жөніндегі орынбасары Уйғун Умаров бұл халықаралық жарыстың әлемдік мәдениеттер мен өнер тоғысқан Париж қаласындағы Эйфель мұнарасы жанында өткізілуі дәстүрге айналғанын, жыл сайын турнирдің беделі артып, әлемнің үздік спортшыларының назарын аударып келе жатқаны және бұл күрестің спорт түрі ретінде халықаралық аренада кеңінен танылып келе жатқанын атап өтті.

Жарыстарға әлемнің 20-дан астам елінен 100-ге жуық ең мықты күрес шеберлері қатысып жатқаны айтылды. Сонымен қатар, турнир аясында өзбек өнері, қолөнері мен ұлттық тағамдары, сондай-ақ күй мен әндерден тұратын мәдени шара ұйымдастырылатыны хабарланды.

Еске сала кетейік, бұл турнирде балуандар -90 және +90 кг, ал әйелдер -70 және +70 кг салмақ дәрежелерінде жеңіс үшін бозкілемде бақ сынамақ.