Парижда «Mondiale du Tourisme» 47-халқаро кўргазмаси бўлиб ўтди. Миллий сайёҳлик авиакомпаниялари, сайёҳлик агентликларини намойиш этаётган турли давлатларнинг 200 та экспонентлари қаторида Самарқанднинг «Rev Tours» ва «Zamin Travel» каби иккита сайёҳлик компаниялари тақдимоти ҳам ўтказилди.
Франциянинг «Salaun Holidays» компанияси мамлакатимизнинг кўп йиллик ҳамкори. 2023 йилда ушбу сайёҳлик оператори кўмагида «Ouzbekistan, au pays des Mille et une vies» номли ҳужжатли фильм суратга олинган эди. “Ушбу фильм томошабинларни Ўзбекистоннинг энг гўзал масканлари, самимий ва меҳмондўст халқи билан таништиради”, - дейилади кўргазманинг ахборот материалида.
Тадбир доирасида кўп сонли меҳмонларда катта қизиқиш уйғотган ушбу фильмнинг тадқимоти бўлиб ўтди.
- “Мен ўтган йили Ўзбекистонга бориш бахтига муяссар бўлдим. Бу саёҳат менда унутилмас таассурот қолдирди. Маҳобатли меъморчилик иншоотлари, табиий ландшафтларга бой афсонавий тарихий шаҳарлар ва албатта, ўзбек халқининг самимийлиги ва меҳмондўстлиги бутун дунёдаги саёҳатчиларни ўзига жалб қилади. Франциялик сайёҳлар катта қизиқиш билан юртингизга ташриф буюради, деб ишонч билан айта оламан.”, - дейди гид-конферансье Жан-ив Гюген.
Ўзбекистонда хорижий сайёҳларни қабул қилиш учун замонавий меҳмонхона ва логистика инфратузилмаси яратилган, қизиқарли саёҳатлар ва мароқли дам олиш учун барча қулайликлар мавжуд.
- «Францияда энг йирик кўргазмалардан бири бўлган «Mondiale du Tourisme» намойишида Ўзбекистоннинг иштирок этаётганидан мамнунмиз. Жорий йилги кўргазмада 66 минг нафардан зиёд киши иштирок этди. «Rev Tours» ва «Zamin Travel» компаниялари бир неча йилдан буён кўргазмада иштирок этиб, юртингизнинг бой сайёҳлик салоҳиятини муваффақиятли таништириб келмоқда. Ўзбекистонга ташриф буюраётган франциялик сайёҳлар сони сезиларли даражада ошди. Ўзбекистон компанияларининг бу каби муҳим тадбир ва тақдимотлардаги иштироки туфайли Франциядан мамлакатингизга сайёҳлар сони янада ортади, деган умиддамиз”, - дейди «Mondiale du Tourisme» кўргазмасининг тижорат ишлари бўйича директори Фредерик Амброссино.
Азиза Алимова тайёрлади, ЎзA