Парижда "Глобал хавфсизлик тўғрисида" ги қонун лойиҳасининг 24 моддасига қарши тинч бошланган намойишлар тартибсизликларга уланди.

24 ноябрь куни Франция Миллий Ассамблеяси  "Глобал хавфсизлик тўғрисида" ги қонун лойиҳасини биринчи ўқишда қабул қилди, дейилади "РИА Новости" хабарида.

Ҳужжатнинг 24 моддасига биноан, полициячининг юз қиёфаси ёки унинг шахсига оид бошқа фото маълумотни тарқатган шахсга нисбатан озодликдан маҳрум қилиш ёки 45 минг евро миқдорида жарима солиниши белгиланган.

Мамлакат Журналистлар касаба уюшмаси томонидан қонун лойиҳасининг ушбу бандига нисбатан  норозилик намойиши ташкил этилди.  

Улар ҳужжат кучга киргандан кейин оммавий ахборот воситалари ходимлари ва фуқаролар хавфсизлик хизмати ходимларининг митинг ва норозилик намойишларида қилган ишларини  суратга олиш имкониятидан маҳрум бўлишларидан хавотирда эканлигини билдирмоқда.

Франция расмийлари эса ушбу қонун лойиҳаси журналистларнинг полиция ходимлари ҳаракатларини ёзиб олишларини тақиқламаслигини таъкидламоқда.