Франциянинг Париж шаҳрида Индонезия ва Гвинея олимпия терма жамоалари “Париж-2024” футбол мусобақаларининг сўнгги йўлланмаси учун ўзаро рақобатлашди.

Мазкур ўйинда Гвинея рақиблари устидан 1:0 ҳисобида зафар қучди ва Олимпиада йўлланмасини қўлга киритиб, “А” гуруҳидан жой олди.  

Шу тариқа жорий йилнинг 24 июлидан 10 август кунига қадар Франция пойтахти Париж шаҳрида бўлиб ўтадиган Олимпиаданинг футбол мусобақасида иштирок этадиган барча терма жамоалар номи аниқ бўлди.  

Мазкур мусобақада тўрттадан жамоа худди шунча гуруҳга бўлинган ҳолда турнир ғолиблиги учун кураш олиб боради.    

Олимпия ўйинлари футбол мусобақасида гуруҳлар қуйидагича кўриниш олди:    

«А» гуруҳи – Франция, АҚШ, Гвинея, Янги Зеландия;    

«B» гуруҳи – Аргентина, Марокаш, Ироқ, Украина;    

«C» гуруҳи – Ўзбекистон, Испания, Миср, Доминикан Республикаси;    

«D» гуруҳи – Япония, Парагвай, Мали, Исроил.    

Маълумот ўрнида, Темур Кападзе бошчилигидаги Ўзбекистон Олимпия терма жамоаси Қатарда ўтказилган Осиё кубогида иккинчи ўринни эгаллаб, “Париж-2024”га йўл олган эди.   

Ўзбекистон Олимпия терма жамоаси "Париж-2024" мусобақасида «С» гуруҳида иштирок этади. Мазкур гуруҳдаги илк ўйинимиз 24 июль куни Испания термасига қарши ўтади. Иккинчи тур эса 27 июль куни Мисрга қарши ўтса, 30 июль куни Доминикан Республикаси билан учинчи турда рақобатлашади.    

Жавоҳир Тошхўжаев, ЎзА