Muaytay sport turi mas’ullari XXXIII yozgi Olimpiya o‘yinlari davomida Parij shahridagi bir necha sport majmuasida, maydonchalarda ko‘rgazmali chiqishlar namoyish etadi. Bu haqda Xalqaro muaytay assotsiatsiyalari federatsiyasi (IFMA) xabar tarqatdi.

Muaytayni Olimpiya o‘yinlari tizimiga kiritish borasidagi sa’y-harakat bir necha yil oldin boshlangan, 2016 yil Xalqaro olimpiya qo‘mitasiga olimpiya sport turi sifatida tan olinish bo‘yicha rasman so‘rov taqdim etilgan.

“Rio-2016”da, 2018 yil Buenos-Ayresdagi o‘smirlar Olimpiya o‘yinlarida targ‘ibot davom ettirilgan. “Tokio-2020” Olimpiadasida koronavirus pandemiyasi tufayli to‘xtagan jarayon “Parij-2024”da yana jonlandi.

Joriy yil may oyida IFMA mahorat sinovini ifodalovchi xalqaro o‘quv-mashg‘ulot va ko‘rgazmali chiqishni Olimpiadaning qadimiy vatani – Gretsiyada o‘tkazdi.

Xullas, Fransiya poytaxtidagi Olimpiya maydonchalarida, xususan “Club France”, “Baan Muay” va “UNESCO” qarorgohi joylashgan hududda muaytay bo‘yicha jahon chempionligiga erishgan Tailand, Gretsiya, Fransiya, Filippin va Malayziyadan mahoratli sportchilar ushbu sport turi jozibasini ko‘rsatishga harakat qilishadi.

T. Ro‘ziyev, O‘zA