2025 йилнинг 10-13 декабрь кунлари Дубайда ўтказилган V Параосиё ўйинларида юртимиз параспортчи ёшлари муваффақиятли иштирок этди. Мусобақада юртимиз терма жамоаси жами 197 та медални қўлга киритиб, 35 давлат орасида умумжамоа ҳисобида биринчи ўринни эгаллади. Қувонарлиси, фахрли чемпионлар сафида юртимиз шарафини ҳимоя қилган 14 нафар воҳалик спортчиларнинг барчаси совриндорлар қаторидан ўрин олди. Улар орасида Осиё ўйинларининг ўзида амалдаги Осиё ва жаҳон рекордини янгилаган Бахриддин Холбўтаев ҳам бор.

Бахриддин Холбўтаев 2008 йилда Сурхондарё вилояти Қизириқ туманидаги Қишлоққозон маҳалласида туғилган, парапоурлифтинг билан 2 йилдан буён шуғулланади. Спортга бўлган оддий қизиқиш унинг юрагига катта орзуларни, мақсадларни олиб кирган. Туман, вилоят ва республика мусобақаларида иштирок этиб, ғолибликни қўлга киритиб юрган юртдошимизни бугун дунё тан олди.  

[gallery-27032]

– Биринчи маротаба халқаро даражадаги мусобақада иштирок этдим, - дейди Бахриддин Холбўтаев. – Қўрқув, ҳаяжон бор эди ичимда. Лекин мендаги сабр, матонат ва мақсад ҳамма нарсадан устун келди. Мақсад бўлса ким учун, нима учун ҳаракат қилаётганингизни билсангиз ўйлаганингиздан ҳам кўпроқ нарсага эриша олар экансиз. Бу ғалаба – шунчаки медаль ёки рекорд эмас. Бу –ироданинг, орзу ва ишончнинг зафаридир.  

<iframe width="560" height="315" src="https://www.youtube.com/embed/scOhZf72V1s?si=UwxMa7YlivYGOLUo" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Жонибек ҚЎЗИМУРОДОВ(сурат,видео),ЎзА