Таиланднинг Паттайя шаҳрида бўлиб ўтган параканоэ бўйича Осиё чемпионати ўз якунига етди.

Эътиборлиси, Осиёнинг 10 га яқин мамлакатидан 50 дан ортиқ спортчи иштирок этган ушбу мусобақада Ўзбекистон терма жамоаси аъзолари 4 тадан олтин ва кумуш медалга сазовор бўлган ҳолда, умумжамоа ҳисобида биринчи ўринни қўлга киритди. Кучли учликдан Эрон ва Қозоғистон терма жамоалари жой олди.

Осиё чемпионатининг KL3 классида аёллар ўртасида ҳамюртимиз Шаҳноза Мирзаева 49.882 сония натижа билан олтин медалга сазовор бўлди.

Иродали спортчимиз мурасасиз баҳсларда Эрон, Қозоғистон, Ҳиндистон ва Таиланд спортчиларини ортда қолдирди. 
Худди шунингдек, Осиё чемпионатининг KL3 классида ҳамюртимиз Ҳасан Қўлдашев 42.232 сония натижа билан Эрон, Таиланд, Ҳиндистон, Қозоғистон ва Жанубий Корея спортчиларини ортда қолдирган ҳолда олтин медални қўлга киритди.

Чемпионатининг VL3 класси баҳсларида яна бир спортчимиз – Ҳайтмурод Шерқўзиев 49.787 сония натижа билан олтин медалга эгалик қилган бўлса, 50.695 натижа қайд этган Тўрабек Назарқулов кумуш медални қўлга киритди. Мазкур йўналишнинг аёллар ўртасидаги баҳсларида Мухлиса Эшмирзаева ҳам олтин медалга эга чиқди.

VL2 (каноэ) ҳамда KL2 (байдарка) классларида совринли ўринларга даҳвогарлик қилган Ирода Рустамова эса 2 та кумуш медалли бўлди.

Терма жамоамиз аъзоларидан Азизбек Абдулҳабибов (KL2) ҳам сўнгги паллада кумуш медалли бўлди.

Аҳамиятлиси, якунига етган чемпионатда 8 марта Ўзбекистон байроғи юксалиб, 4 марта мадҳиямиз янгради.

Т. РЎЗИЕВ,  ЎзА.