Ангрен шаҳрида жойлашган «Янгиобод» Республика ўқув-машғулот базасида пара енгил атлетика бўйича Ўзбекистон чемпионати баҳслари қизғин давом этмоқда. Мазкур мамлакат биринчилигида 600 нафарга яқин пара атлет пара енгил атлетиканинг турли йўналишларида медаллар учун рақобатлашмоқда.

Чемпионатнинг дастлабки кунги баҳсларида спортчилар найза, диск ва ядро улоқтириш, шунингдек югуриш ва баландликка сакраш дастурида илк босқичда беллашди. Бугун, 8 май куни иштирокчилар пара атлетиканинг қолган йўналишларида баҳсларга киришади. Шуни таъкидлаб ўтиш лозимки, ушбу чемпионат терма жамоамиз таркибини янада кучайтириш ва янги номларни аниқлаш мақсадида ташкил этилмоқда.  

Эслатиб ўтамиз, ўтган ҳафтада «Янгиобод» Республика ўқув-машғулот базасида пара енгил атлетика бўйича ёшлар ўртасида Ўзбекистон чемпионати ўтказилиб, унда мамлакатимизнинг турли ҳудудларидан 450 нафардан ортиқ жисмоний имконияти чекланган ва ногиронлиги бўлган ёшлар иштирок этган ва улар орасида яхши натижа кўрсатган пара атлетлар «Тошкент-2025» ёшлар Параосиё ўйинлари учун сараланган эди.  

Жавоҳир Тошхўжаев,  

ЎзА