Сирдарё вилояти Гулистон шаҳрининг “Боғишамол” маҳалласида истиқомат қилувчи, тўрт фарзанднинг отаси Александр пақилдоққа ишқибоз эди.

Ўзи яшайдиган кўп қаватли уй олдида салютдан қонунга хилоф равишда фойдаланиб, вақтичоғлиқ қилмоқчи бўлди. Лекин у отган салют қўшнисининг вояга етмаган фарзандини кўзига бориб текканини билмай ҳам қолди. Бир сониялик завқдан келган азият қўни-қўшниларнинг нафратига сабаб бўлди.  

Сирдарё вилоят кўз касалликлари шифохонасига етказиб борилган болакайга тез тиббий ёрдам кўрсатилди. Лекин болакайнинг олган жароҳати тузалиши учун анчагина вақт ва маблағ талаб қилиниши айтилди. Жиноят ишлари бўйича Гулистон шаҳар судида кўриб чиқилган мазкур иш муҳокамасида судланувчи сифатида сўроқ қилинган Александр айбига тўлиқ иқрорлик билдирди.

Суд гувоҳларнинг кўрсатувлари ва ишдаги мавжуд далиллар, жабрланувчининг сўзлари, унга етказилган зарарни қисман қоплаганлигини жазони енгиллаштирувчи ҳолатлар деб топиб, жабрланувчининг судланувчига даъвоси мавжуд эканлигини эътиборга олиб ҳукмни эълон қилди. Александрга Ўзбекистон Республикаси ЖК 2501-моддаси 2-қисмининг “д” банди билан уч йил озодликдан маҳрум қилиш жазоси тайинланди.  

Александрга қизиқиши қимматга тушадиган бўлди. Энди у уч йилини панжара ортида ўтказади.

Бобошер Қурбонов,

Сирдарё вилояти судининг жиноят ишлари бўйича

судлов ҳайъати раиси.

ЎзА