Дүниежүзілік денсаулық сақтау ұйымының (ДДСҰ) мәліметінше, вирус Тынық мұхитының батысындағы Порт-Морсби және Лаэ қалаларындағы ағынды сулар мен қоршаған орта үлгілерінен анықталған.

ДДСҰ-ның Папуа – Жаңа Гвинеядағы өкілі Севил Хусейнова брифинг барысында Лаэ қаласындағы екі баладан полиовирустың 2-типті штаммы анықталғанын айтты.

– Балалар арасында вирус жұғуы полиомиелит індетінің басталғанын білдіреді, – деді ол. – Полиомиелит – аса жұқпалы ауру. Вакцинация деңгейі төмен елдерде бұл вирус адамнан адамға тез тарайды.

Папуа – Жаңа Гвинеяның денсаулық сақтау министрі Элиас Капаворе жағдайды «қатерлі, бірақ бақылауға алынатын» деп бағалаған. 

«ArabNews» басылымының хабарлауынша, әдетте лас су мен кәріз жүйесі арқылы таралатын бұл вирус аса жұқпалы әрі өлімге әкелуі мүмкін.