Norin tumani “Yoshlar markazi”da O‘zbekiston Xalq demokratik partiyasidan O‘zbekiston Respublikasi Prezidentligiga nomzod Ulug‘bek Inoyatovning Namangandagi ishonchli vakili saylovchilar bilan uchrashdi.

Saylovoldi tashviqotida Xalq deputatlari tuman Kengashi deputatlari, O‘zXDP faollari, boshlang‘ich partiya tashkiloti raislari, yoshlar tashkiloti xodimlari, saylovchilar ishtirok etdi.  

Tadbir avvalida O‘zXDP Norin tumani kengashi raisi Nilufar Abdumajidova mamlakatimiz ahli yana bir muhim ijtimoiy-siyosiy tadbir arafasida turgani, mazkur jarayonlardagi faollik xalqimizning Yangi O‘zbekistondagi islohotlarga befarq emasligini qayd etdi. Ishonchli vakil, Oliy Majlis Qonunchilik palatasi deputati, parlamentdagi O‘zXDP fraksiyasi a’zosi Shohista Turg‘unova Prezidentlikka nomzod Ulug‘bek Inoyatovning tarjimai holi hamda saylovoldi dasturini tanishtirdi.  

Nomzodning saylovoldi dasturida belgilangan kuchli ijtimoiy siyosat, arzon uy-joy va sifatli kommunal xizmatlar, sifatli tibbiy yordam ko‘rsatish, yoshlar uchun ta’lim kafolatlarini mustahkamlash, ijtimoiy yo‘naltirilgan bozor iqtisodiyoti, tovar va xizmatlarning ijtimoiy maqbulligi, ijtimoiy tenglikka asoslangan demokratiya, sud-huquq islohotlari kabi to‘qqizta ustuvor yo‘nalish bo‘yicha aniq, manzilli taklif hamda tashabbuslar ilgari surilgani tadbir ishtirokchilari e’tiborini tortdi.  

Uchrashuvda, ishonchli vakil yig‘ilganlarni nomzodning saylovoldi dasturi va saylov jarayonlari yuzasidan qiziqtirgan savollariga javob berdi va saylovchilarni O‘zbekiston Respublikasi Prezidenti saylovida Ulug‘bek Inoyatovga ovoz berishga chaqirdi.  

Oqilxon Dadaboyev,

O‘zA