Жорий йилнинг 2 май куни Ўзбекистон Республикаси Президенти Шавкат Мирзиёевнинг Германия Федератив Республикасига расмий ташрифи доирасида Ўзсаноатқурилишбанк ва “Commerzbank AG” ўртасида 100 миллион евро миқдоридаги қўшимча келишув тузилди.

Давлатимиз раҳбарининг Германия Федератив Республикасида давом этаётган ташрифи доирасида Берлин шаҳрида икки давлат ишбилармон доираларининг бизнес форуми бўлиб ўтди. Форумда ўзаро манфаатли савдо-иқтисодий ҳамкорликнинг кенгайтирилишига қаратилган қатор муҳим ҳужжатлар имзоланди.

Хусусан, халқаро ишбилармонлик учрашуви Ўзсаноатқурилишбанкнинг “Commerzbank AG” билан алоқаларини ривожлантиришда янги имконият эшигини очди.

Келишувга биноан ушбу хорижий молия муассасасидан жалб қилинадиган маблағлар кичик ва ўрта бизнесни молиявий қўллаб-қувватлашга йўналтирилади.

Таъкидлаш жоиз, Ўзсаноатқурилишбанк тизимида халқаро ҳамкорлик борасида Германия банк-молия тармоғи билан шерикчилик муносабатлари тобора кенгайиб бормоқда.

Жумладан, Ландесбанк Баден-Вюрттемберг ҳамда “Helaba” банки билан ҳам жами 100 миллион евролик кредит битимлари имзоланди. Шу йилнинг 27 апрель куни эса, мамлакатимизда бўлиб ўтган иккинчи Тошкент халқаро инвестиция форумида Германиянинг “Helaba” банки билан 35 млн. еврога тенг ҳамкорлик тўғрисида келишув тузилган эди. 

Бизнес форумда томонлар ўзаро амалга оширилаётган ушбу келишувлар икки давлат бизнес доиралари ўртасида ҳамкорликни кенгайтириш ҳамда Ўзбекистонда тадбиркорлик соҳасини ривожлантиришга хизмат қилишини таъкидлади.

Банк Ахборот хизмати

Реклама ҳуқуқи асосида