Жанубий Кореянинг Мужу шаҳрида таэквондо WT бўйича нуфузли “Grand Prix Challeng ” турнирида дунёнинг 30 мамлакатидаги 330 нафардан зиёд таэквондочилар иштирок этди. Ўзбекистон миллий терма жамоаси мазкур мусобақада ўзининг 15 нафар спортчиси билан қатнашди.

Гран-прининг учинчи кунида вазни 67 килограммгача бўлган қизлар орасида  терма жамоамиз аъзоси Озода Собиржонова сўнгги ҳал қилувчи финал босқичида АҚШ шарафини ҳисоя қилган Кристина Тичот билан рақобатлашди. Афсуски, ушбу беллашувда Озодага омад кулиб боқмади ва кумуш медаль соҳибасига айланди. Испаниялик Лена Морено Реес бронза медалини қўлга киритди.  

Эслатиб ўтамиз, июль ойида айнан Жанубий Кореянинг Мужу шаҳрида ўтган "World Taekwondo Diamond Games" турнирида Светлана Осипова ўз вазнида барча рақибларини мағлуб этиб, олтин медалга эга чиққан эди.

Жавоҳир Тошхўжаев, ЎзА