Қозоғистонда нефть қазиб олиш режа асосида давом этади
Куни кеча халқаро нефть бозорида нархнинг кескин тушиб кетиши қора олтин экспортёрларини қийин аҳволга солиб қўйди. Хўш, бу борада қўшни Қозоғистонда аҳвол қандай?
Куни кеча халқаро нефть бозорида нархнинг кескин тушиб кетиши қора олтин экспортёрларини қийин аҳволга солиб қўйди. Хўш, бу борада қўшни Қозоғистонда аҳвол қандай?
Қирғизистоннинг “Кабар” ахборот агентлиги маълум қилишича, Қозоғистон энергетика вазири Нурлан Ногаев нефть қазиб олиш 2020 йил учун белгиланган режа бўйича давом эттирилиши, ҳозир нефть қазиб олишни ошириш ёки камайтириш режалаштирилмаётганини айтган.
Вазир, шунингдек, Қозоғистоннинг ОПЕК+ келишувига нисбатан тутган позицияси ҳақида ҳам фикр билдирган.
– Мақбул қарорга келиш ҳар доим фойдали. ОПЕК аъзоларининг келгуси ҳаракати қандай бўлишини эса вақт кўрсатади, – деди у.
Маълумот учун: нефть қазиб олишни қисқартириш бўйича ОПЕК келишуви 2016 йил 10 декабрда имзоланган. Ушбу келишув муддати тўрт марта узайтирилган бўлиб, энг сўнггиси ўтган йил 1 июлда юз берган. Охирги келишувга кўра, қазиб олинадиган нефть ҳажмининг кунлик меъёри 1,2 миллион баррель атрофида бўлиши керак.