Қозоғистон кунлик нефть қазиб олиш ҳажмини 390 минг баррелга қисқартиради
Мамлакат ОПЕК+ битими доирасида кунлик нефть қазиб олиш ҳажмини ана шу миқдорда қисқартириш шартини ўз зиммасига олди, деб хабар тарқатди “Казинформ” ахборот агентлиги.
Мамлакат ОПЕК+ битими доирасида кунлик нефть қазиб олиш ҳажмини ана шу миқдорда қисқартириш шартини ўз зиммасига олди, деб хабар тарқатди “Казинформ” ахборот агентлиги.
Хабарда таъкидланишича, коронавирус пандемияси туфайли барча мамлакатларда қора олтинга бўлган талаб кескин тушиб кетди. Шундай экан, ОПЕК котибиятининг нефть қазиб олишни барча экспортёр мамлакатлар жамоавий тарзда қисқартириши бўйича таклифи ўз вақтида кўрилган чора ҳисобланади.
“Агарда ОПЕК+ битими имзоланмаганда эди, нефть ишлаб чиқарувчи мамлакатлар бари бир уни қисқартиришга тўғри келарди, чунки талаб бўлмагандан кейин бозор иштирокчиларининг барчасида нефть омборлари маҳсулотга тўлиб кетган бўларди. ОПЕК+ келишуви туфайли, нефть қазиб олишни қисқартириш жамоавий тарзда амалга оширилади ва назорат қилинади. Бу эса, нефть нархининг ошишига олиб келади”, — қўшимча қилди Қозоғистон энергетика вазирлиги матбуот хизмати.
Айни дамда мамлакат энергетика вазирлиги томонидан мазкур шароитда нефть қазиб олишни қисқартириш бўйича сценарий ишлаб чиқилмоқда.