Mahallabay ishlash dasturi – iqtisodiy barqarorlik va aholi manfaatlari yo‘lida qo‘yilgan yana bir qadam. Shuningdek, kambag‘allikni qisqartirish, ishsiz fuqarolar va ehtiyojmand oilalarga alohida e’tibor qaratishda tashkiliy-moliyaviy ko‘mak berishning manzilli tizimi hisoblanadi.

“Sayxunobod” tajribasi asosida boshlangan tashabbus doirasidagi ishlar bugun Toshkent shahrida ham tizimli ravishda davom etmoqda. Tijorat banklari hamda mahalla yettiligi hamkorligida “mahallabay” ishlash dasturi asosida, har bir hududning o‘ziga xos imkoniyatlaridan foydalanib, aholi daromadlarini oshirish va bandligini ta’minlashning samarali yechimi topilmoqda. 

“O‘zmilliybank” AJ Toshkent shahar bosh boshqarmasiga poytaxtimizdagi 147 ta mahalla biriktirilgan bo‘lib, “mahallabay” ishlash dasturi doirasida amalga oshirilgan chora-tadbirlar natijasida shu kungacha 7 ming 600 nafar ishsiz fuqarolarning doimiy bandligi ta’minlangan. - Davlatimiz rahbari tomonidan banklar oldiga har bir mahalladagi kam ta’minlangan oilalar bilan manzilli ishlash va ularning daromadini oshirish bo‘yicha ko‘maklashish vazifasi yuklatilgan edi, - deydi “O‘zmilliybank”AJ Sergeli BXM bo‘lim boshlig‘i Shahobiddin Abdullayev. - Ushbu vazifalar asosida Sergeli BXMga ham hududdagi 13 ta mahallalar biriktirib berildi. O‘rganishlar natijasida kam daromadli oilalar aniqlanib, aholini ish bilan ta’minlanishi uchun sharoit yaratdik. 

Yangi ish o‘rinlarini yaratishda tadbirkorlik sub’ektlari mamlakatimizning muhim iqtisodiy tayanchiga aylanmoqda. Sergeli tumani “Nurhayot” mahallasi hududida bo‘sh turgan bino “O‘zmilliybank” moliyaviy ko‘magi va tadbirkor tashabbusi bilan endilikda 10 nafar mahalla ayollarining bandligini ta’minlashga xizmat qilmoqda. 

Mahsulotlarga bozordagi talab ancha yaxshi. Mahalla hududida boshlangan yana bir bunyodkorlik ishlari ham eng avvalo hudud aholisi uchun qo‘shimcha ish o‘rinlari yaratish, qolaversa, hududda ta’lim xizmatlari sifatini oshirishga qaratilgan yangi loyiha bo‘ldi. Bu yerda yil yakuniga qadar “O‘zmilliybank” moliyaviy ko‘magida 600 o‘rinli zamonaviy xususiy maktab qad rostlaydi. 

- Davlatimiz rahbari tomonidan aholi daromadlarini oshirish va hududlarda kichik tadbirkorlikni yo‘lga qo‘yish orqali oilalar byudjetini mustahkamlashga qaratilgan chora-tadbirlar qizg‘in amalga oshirilmoqda, - deydi nodavlat maktabgacha ta’lim tashkiloti direktori Shoira Shodmonova. - To‘g‘risi, biz ham bu jarayonda faol ishtirok etishni maqsad qildik. Bog‘chamiz yonida xususiy maktab barpo etish uchun milliybankdan imtiyozli kredit olib, binoni qurishni boshlab yubordik. Mazkur maktabning birinchi bosqichida 300 nafarga yaqin, ikkinchi bosqichida ham 300 nafarga yaqin o‘quvchilarni ta’limga qamrab olish orqali 60 ta yangi ish o‘rinlari yaratishni reja qilganmiz. “O‘zmilliybank” AJ tomonidan poytaxtimizda “mahallabay” ishlash dasturi doirasidagi ishlar tizimli ravishda davom ettirilmoqda. 

“O‘zmilliybank” AJ matbuot xizmati