Rivojlangan davlatlar tajribasidan ma’lumki, banklar moliyaviy xizmatlar ko‘rsatish bilan chegaralanib qolmaydi, balki ishbilarmonlik muhitini yaxshilash, aholini biznesga jalb qilishda yetakchi kuch sanaladi.
“O‘zmilliybank” AJ xalqimizni tadbirkorlikka, ishbilarmonlikka o‘rgatishi, ta’bir joiz bo‘lsa, shunga yetaklashi yo‘lida faollik ko‘rsatmoqda. Hududlarda sifatli hamda zamonaviy bank xizmatlari ko‘rsatish yo‘lga qo‘yilib, ishlar “mahallabay” tizimi asosida tashkil etilayotir.
Farg‘ona viloyatida tadbirkorlik sub’ektlari banklar tomonidan har tomonlama qo‘llab-quvvatlanmoqda. “O‘zmilliybank” AJ ning viloyat filiali ham mazkur yo‘nalishdagi ishlarda tadbirkorga madad bo‘layotir.
Farg‘ona shahridagi “Gold Quality Invest” xususiy korxonasi qisqa fursat ichida ichki va tashqi bozorda o‘z o‘rnini topa oldi. O‘tgan yilda bu yerda yirik va istiqbolli bolalar o‘yinchoqlari ishlab chiqarish investitsiya loyihasi amalga oshirildi. Bank tadbirkorning biznes g‘oyasini ro‘yobga chiqarish maqsadida 1 million AQSH dollari miqdorida kredit ajratdi. Xitoy davlatidan zamonaviy texnologiyalar olib kelib o‘rnatildi. Umumiy qiymati 15 milliard so‘mlik loyiha ishga tushirilib, sifatli va xaridorgir bolalar o‘yinchoqlari ishlab chiqarish boshlandi.
–Shahardagi kichik sanoat zonasida joylashgan korxonamizda yiliga 47 million dona bolalar o‘yinchoqlari ishlab chiqarish imkoni mavjud, –deydi “Gold Quality Invest” xususiy korxonasi rahbari Tursunali Mamatqulov. – Asosiysi, mahsulotlarimiz to‘liq mahalliy xomashyodan tayyorlanadi, ekologik talablarga to‘la javob beradi. Hozirgi kunda 120 ta yangi ish o‘rni yaratildi hamda 200 nafar kasanachi faoliyat ko‘rsatmoqda. “O‘zmilliybank” AJ bilan mustahkam hamkorlikni yo‘lga qo‘yganmiz. Mazkur loyihada ham ularning xizmati katta.
Ayni kunlarda mazkur korxonada ishlab chiqarilayotgan bolalar o‘yinchoqlari ichki bozor bilan birga Tojikiston, Qirg‘iziston va Qozog‘istonga eksport qilinmoqda. E’tiborli jihati, bu yerda asosan yoshlar mehnat qilmoqda. Diyorbek Komilov Farg‘ona shahridagi “Yuqori Qirguli” mahallasida istiqomat qiladi. Payvandchilik mutaxassisligiga ega bo‘lgan 18 yoshli bu yigit zamonaviy texnologiyalarni boshqarishni qunt bilan o‘rgandi.
– Bolalar o‘yinchoqlarini ishlab chiqarish jarayoni juda qiziqarli, –deydi Diyorbek. – Har bir kichik butlovchi qismni tayyorlash uchun e’tibor va ehtiyotkorlik kerak. Hozirda yangi turdagi mahsulotlarni ishlab chiqarish bo‘yicha ham ish olib boryapmiz.
“O‘zmilliybank” AJ ning viloyat filiali joriy yilda tadbirkorlikni yanada rivojlantirish, ayniqsa, aholini tadbirkorlikka jalb etish borasida ulkan rejalar ishlab chiqqan. Bank filiali istiqbolli loyihalar, g‘oyalar ustida tinimsiz izlanib, mijozlar ehtiyoji uchun maqbul va qulay bo‘lgan xizmat turlarini kengaytirib bormoqda. Bu esa tadbirkorlarni qo‘llab-quvvatlash, viloyat iqtisodiyotini yanada rivojlantirish va turli ijtimoiy masalalarni hal etishda o‘z samarasini bermoqda.
M. Sulaymonov, O‘zA