Prezident tashabbusi amalda
Davlatimiz rahbarining yoshlar bilan o‘tkazilgan tarixiy uchrashuvida mamlakatimizda navqiron avlod vakillarini qo‘llab-quvvatlashning mutlaqo yangi tizimi belgilab berildi. Xususan, haftaning har payshanba kuni “Yoshlar kuni” deb e’lon qilinishi hamda vazirlik, idoralar va banklar rahbarlariga yoshlar bilan doimiy muloqotda bo‘lish, ularning bandligini ta’minlash, tadbirkorlik g‘oyalarini ro‘yobga chiqarish bo‘yicha aniq topshiriqlar berildi.
Ushbu ezgu tashabbus ijrosini ta’minlash maqsadida “O‘zmilliybank” AJ rahbariyati Surxondaryo viloyatida bo‘lib, oliy ta’lim muassasalari bitiruvchilari bilan “Bitiruvchilarning bandligini ta’minlash va biznes g‘oyalarini moliyalashtirish bo‘yicha yangi imkoniyatlar” mavzusida ochiq muloqot o‘tkazdi.
Termiz davlat universitetida tashkil etilgan mazkur uchrashuvda viloyatdagi 6 ta oliygohning 700 nafardan ziyod bitiruvchilari onlayn va oflayn shaklda ishtirok etib, o‘zlarini qiziqtirgan savollarga javob oldi. Muloqot davomida bitiruvchilarni ish bilan ta’minlash, startap loyihalarni qo‘llab-quvvatlash va bank tomonidan yosh tadbirkorlar uchun yaratilgan imtiyozli kredit shartlari atroflicha tushuntirildi.
[gallery-27885]
Raqamlarga to‘xtaladigan bo‘lsak, bank tomonidan amalga oshirilayotgan “Kelajakka qadam” dasturi doirasida hozirgacha 6 ming nafardan ortiq yoshlar tadbirkorlikka jalb etilib, ularning loyihalari uchun 378 milliard so‘m mablag‘ yo‘naltirilgani yoshlarning iqtisodiy salohiyatini oshirishda muhim omil bo‘layotgani alohida qayd etildi.
Tadbirning amaliy qismida talabalar o‘zlarining innovatsion g‘oyalari va biznes loyihalari taqdimotini o‘tkazdi. Uchrashuv yakunida bildirilgan 30 dan ortiq taklif va mulohazalar atroflicha muhokama qilinib, istiqbolli loyihalarni moliyalashtirish va bandlikni ta’minlash borasida o‘zaro hamkorlikni yanada kuchaytirish yuzasidan kelishib olindi.
Bu kabi muloqotlar yoshlarning jamiyatda o‘z o‘rnini topishi va tadbirkorlik faoliyatini boshlashi uchun mustahkam zamin bo‘lib xizmat qiladi.
“O‘zmilliybank” AJ
Matbuot xizmati