“O‘zmilliybank” AJ Farg‘ona viloyati Bosh boshqarmasida 9 dekabr – Xalqaro korrupsiyaga qarshi kurashish kuni munosabati bilan e’lon qilingan “Korrupsiyaga qarshi kurashish oyligi” doirasida “Ochiq eshiklar kuni” tadbiri tashkil etildi. Unda Farg‘ona viloyat hokimligi Korrupsiyaga qarshi ichki nazorat bo‘limi boshlig‘i Farhod No‘g‘manov so‘zga chiqdi va mazkur illatga qarshi kurashishda o‘zaro hamkorlikning ahamiyati to‘g‘risida to‘xtalib o‘tdi. Shuningdek, tadbirda bank xodimlarining kasbiga mas’uliyati, o‘z vazifasiga vijdonan yondashishi va korrupsion holatlarni keltirib chiqaruvchi har qanday vaziyatlarga murosasiz bo‘lib, ularni bartaraf etish choralari to‘g‘risida fikr yuritdi.

Ayni paytda boshqarmada xavfsizlik, rejim va axborotni himoyalash bo‘limi – Korrupsiyaga qarshi kurashish (komplayens nazorat) xizmati tomonidan ushbu illatning oldini olish yuzasidan aniq vazifalar va qilinishi lozim bo‘lgan ishlar belgilab olingan. Asosiysi, mazkur tadbirlar yil davomida bank xodimlari o‘rtasida muntazam o‘tkazilib boriladi.  

 – Bugungi tadbir bank tizimida faoliyat olib borayotgan har bir xodimning ishga bo‘lgan mas’uliyatini yana bir karra oshirishga, shuningdek, hushyorlikka chaqirishi bilan ahamiyatga ega, – deydi bankning xavfsizlik, rejim va axborotni himoyalash bo‘limi mutaxassisi Karimjon Begmatov. – Boisi bu sohaga har yili yangi-yangi xodimlar va mutaxassislar ishga qabul qilinadi. Bu targ‘ibot va tashviqot tadbirlari, shubhasiz, ular uchun ham ogohlikka da’vat bo‘ladi.  

“O‘zmilliybank” AJ  

Matbuot xizmati