Ушбу "Коррупцияга қарши курашиш менежмент тизими" халқаро сертификати комбинат фаолиятида шаффофлик ва очиқликни таъминлашда муҳим аҳамият касб этади. Негаки, унга  асосан мазкур корхонанинг иш тартиби коррупцияга қарши курашиш менежменти тизимининг халқаро стандартларга мувофиқлигини англатади.

"Ўзметкомбинат" акциядорлик жамиятининг Кузатув кенгаши ҳузуридаги комплаенс хизмати бошлиғи Алишер Бадалбоевнинг  таъкидлашича,
ISO 37001:2016 сертификатига эришиш нафақат корхона учун, балки бутун соҳа учун катта ютуқдир. 

-Биз коррупция хавфларини минималлаштиришга ва тизимда шаффофликни таъминлашга йўналтирилган ички ҳужжатларни ишлаб чиқдик ҳамда уларни амалда жорий этдик. Мақсадимиз эса коррупцияга қарши курашда халқаро стандартларга  мувофиқ бўлиш ва ходимларимиз ўртасида коррупцияга қарши иммунитетни шакллантиришдир,- деди у.

Шунингдек, А. Бадалбоевнинг сўзларига кўра, Комплаенс хизмати ҳамда Корпоратив хавфсизлик ва ресурсларни ҳимоя қилиш департаменти Коррупцияга қарши курашиш агентлиги билан ҳамкорликда самарали чора-тадбирларни кўрган. Жумладан, 17 та ички идоравий ҳужжат халқаро стандартларга мувофиқ яратилган ва комбинатдаги 89 та функция коррупция хавфи бўйича таҳлил қилинган.

-Биз келгусида коррупцияга қарши курашиш ва манфаатлар тўқнашувини ҳал қилишнинг ҳуқуқий асосларини такомиллаштиришни режалаштирганмиз. Ходимларнинг билим ва кўникмаларини ошириш мақсадида махсус ўқув дастурлари ва қўлланмаларни ишлаб чиқамиз. Шунингдек, жамоатчилик фикрини ўрганиш учун аноним сўровлар ташкил этиш орқали тизимдаги очиқликни янада оширмоқчимиз, — деди Бадалбоев.

Комбинат коррупцияга қарши курашиш бўйича мурожаатларнинг адолатли кўриб чиқилишини таъминлаш ва ҳуқуқ-тартибот органлари билан ҳамкорликни ривожлантиришни ҳам режалаштирган. Ушбу чора-тадбирлар корхонада коррупцияга қарши олиб борилаётган ишларнинг самарадорлигини оширишга хизмат қилади.

Н.Зиёдуллаева, ЎзА