Олий Мажлис Қонунчилик палатасидаги Тадбиркорлар ва ишбилармонлар ҳаракати — Ўзбекистон Либерал-демократик партияси фракцияси томонидан очиқ мулоқот ташкил этилиб, фракциянинг 2025 йилдаги фаолияти юзасидан журналистларга ахборот берилди.

Таъкидланганидек, ўтган йилда фракция электорат манфаатларини ҳимоя қилиш, тадбиркорлар ҳуқуқларини таъминлаш, ишбилармонлик ва инвестиция муҳитини янада яхшилаш, иқтисодий соҳадаги ислоҳотларни қўллаб-қувватлаш ҳамда соҳанинг норматив-ҳуқуқий базасини такомиллаштиришга устувор аҳамият қаратди.

Ўтган йилда Ўзбекистон Либерал-демократик партияси фракцияси ҳамда “Миллий тикланиш” демократик партияси фракцияси биргаликда “Тараққиёт блоки”ни тузди. Парламентдаги кўпчиликни ташкил этган ушбу блок фракциялар ўртасидаги ҳамкорликни янги босқичга олиб чиқди. “Тараққиёт блоки” доирасида фракциялар ўртасида доимий маслаҳатлашув механизми йўлга қўйилиб, қонун лойиҳаларини ишлаб чиқиш, уларни такомиллаштириш ҳамда парламент назорати тадбирларини амалга оширишда ўзаро ҳамжиҳатлик таъминланмоқда.  

Ҳисобот йилида фракция аъзоларининг ташаббуси билан қонун ижодкорлиги йўналишида 2 та қонун лойиҳаси ишлаб чиқилиб, Қонунчилик палатасига киритилди. Шунингдек, фракция аъзолари бошқа фракциялар билан ҳамкорликда 14 та қонун лойиҳасини ишлаб чиқишда ҳам ташаббускор бўлди.  

Фракция аъзоларининг жойлардаги ўрганишлари натижасида жами 10 та парламент назорати тадбири амалга оширилди. Фракция ташаббуси билан 2 та парламент эшитуви, 2 маротаба “Ҳукумат соати” ташкил этилди. Фракция томонидан мансабдор шахсларга 6 та парламент сўрови, шунингдек, сайловчилар мурожаатлари асосида 36 та депутат сўрови юборилди.

Шунингдек, депутатларнинг сайловчилар билан юзма-юз мулоқоти доирасида жами 2 минг 786 та учрашув ўтказилди. 7 мингдан ортиқ аҳоли хонадони, 3,5 га яқин тадбиркорлик субъекти ҳамда 2 минг 625 та ижтимоий соҳа объектига ташрифлар амалга оширилди. Ушбу ўрганишлар давомида аниқланган масалалар фракция мажлисларида муҳокама қилиниб, тегишли вазирлик ва идораларга таклифлар киритилди.

Очиқ мулоқотда фракциянинг 2026 йилга мўлжалланган режалари ҳақида ҳам атрофлича ахборот берилди.

Муҳтарама Комилова,  

ЎзА