“Ўзкимёсаноат” акциядорлик жамиятида “Очиқ эшиклар куни” ўтказилди.

Унда “Ўзкимёсаноат” АЖ ва унинг тармоқ корхоналари фаолиятида коррупцияга қарши курашиш бўйича амалга оширилаётган чора-тадбирлар ўз самарасини бераётгани таъкидланди.  

Қайд этилишича, коррупцион ҳолатлар давлат ва жамиятнинг барқарор ривожланишига салбий таъсир қилади. Шу сабабли,  “Ўзкимёсаноат” АЖ тизимида коррупцияни келтириб чиқариши мумкин бўлган шароитларга қаратилган қатъий чоралар кўрилмоқда.  

Тадбирда “Ўзкимёсаноат” акциядорлик жамиятининг коррупцияга қарши курашиш ва комплаенс бошқармаси бош мутахассиси Муҳаммадали Асроров бу борада олиб борилаётган ишлар ҳақида тақдимот қилди. Унда таъкидланганидек, 2023 йилда коррупцияга қарши курашиш соҳасида олиб борилган саъй-ҳаракатлар юқори баҳоланиб, ушбу ташкилот Коррупцияга қарши курашиш агентлигининг рейтинг баҳолаш индексида 90 балл билан 3-ўрин ва «яшил» кўрсаткични қайд этган.  

[gallery-20828]

– Шу мақсадда “Ўзкимёсаноат” АЖ тизимида коррупцияга қарши курашиш механизмини такомиллаштириш учун бир қатор ички меъёрий ҳужжатлар ишлаб чиқилди. Жумладан, “Коррупцияга қарши курашиш сиёсати”, “Манфаатлар тўқнашувини бошқариш тўғрисида”ги низом, “Коррупциявий хавф-хатарларни баҳолаш услубиёти”, “Одоб-ахлоқ қоидалари”  каби 10 дан ортиқ ички ҳужжат қабул қилинди. Бугунги кунда мазкур ички идоравий ҳужжатлардаги талабларга ташкилот ходимларининг амал қилиши доимий мониторинг қилиб борилмоқда. Хусусан, ташкилотимизнинг “Коррупцияга қарши курашиш дастури” ва ишлаб чиқилган йўл хариталари тасдиқланди. Жамият ходимларининг коррупцион харакатлари юзасидан хабар беришга мўлжалланган алоқа каналлари ҳам ташкил этилган,– деди М.Асроров.  

Тадбирда ташкилотнинг фуқаролар ва жамоатчилик учун очиқлигини таъминлаш мақсадида 30 дан ортиқ ижтимоий аҳамиятга молик маълумоти расмий веб-сайтга жойлаштирилгани алоҳида таъкидланди. Бу ишлар натижасида “Ўзкимёсаноат” АЖ 2023 йилда Коррупцияга қарши курашиш агентлиги томонидан давлат идоралари ўртасидаги Очиқлик индексида 73 балл билан “яшил” кўрсаткични қайд этди. Жамият фаолиятидаги очиқлик  2022 йилга нисбатан +12,2 баллга ўсган.  

Тадбир якунида иштирокчиларнинг саволларига атрофлича жавоблар берилди.  

Н.Зиёдуллаева,  

ЎзА