Яқинда Moody’s халқаро рейтинг агентлиги “Ўзкимёсаноат” АЖга B1 (барқарор) даражадаги халқаро кредит рейтингини берди.

Мазкур рейтинг даражаси “Ўзкимёсаноат” АЖни жаҳоннинг машҳур инвесторлар бозорларига аниқ ва равшан бизнес стратегиясига, шаффоф молиявий ҳисоботларига ва кучли корпоратив бошқарув тизимига эга ишлаб чиқарувчи корхона сифатида намойиш этади. 

Шунингдек, мазкур ютуқ келгусида “Ўзкимёсаноат” АЖнинг иқтисодий барқарорлигини янада оширишга хизмат қилади ҳамда инвестиция лойиҳаларини амалга оширишда хорижий кредитларни давлат кафолатисиз тўғридан-тўғри жалб қилиш имкониятини беради. 

Жамият ахборот хизматининг маълум қилишича, аввалроқ “Ўзкимёсаноат” АЖ мамлакат кимё саноати тарихида илк бор йирик халқаро рейтинг агентлиги Fitch Ratings' нинг BB- “Barqaror” тоифасидаги халқаро кредит рейтингига эга бўлган эди. 

Маълумот ўрнида, Fitch Ratings, Moody’s — Америка корпорациялари бўлиб, халқаро рейтинг агентликларининг “BIG 3”дан ўрин олган. Компаниялар жаҳон кредит бозорларини мустақил ва истиқболли кредит рейтинглари, тушунчалар ва маълумотлар билан таъминлашга ихтисослашган. 

Н.Зиёдуллаева тайёрлади, ЎзА