Ўзбекистон журналистика ва оммавий коммуникациялар университети Интернет журналистика ва Медиаменежмент факультетида бу йилдан янги таълим йўналишларига қабул квоталари эълон қилинган.

Муассаса ахборот беришича, иқтисодий журналистика тушунчаси, унинг мазмун-моҳияти, бугунги кунда соҳанинг ўрни, фактчекинг ва "GSP+" каби муҳим асосий билимларни эгаллаш мамлакатимиз иқтисоди учун, айниқса, аҳамиятли.

Шу боис, олий ўқув юрти томонидан оффшор корхоналар манбаларини аниқлаш ва, умуман, журналистлар мураккаб ҳисобловчи рақамларни қандай очиқлаштириш мумкинлиги бўйича мукаммал билимга эга бўлиши учун ушбу факультетда Иқтисодий журналистика таълим йўналиши ташкил этилган.

– 2022-2023 ўқув йилида 50 нафар талаба мазкур йўналишда таҳсил олади. Энди иқтисодий мавзуга қўл урадиган журналистлар сафи кенгаяди, – дейди Интернет журналистика ва Медиаменежмент факультети декани Гулнора Зокирова.

Бундан ташқари, медиа олами бошқаруви, контент тайёрлаб, уни жамиятга етказиб беришга қадар бўлган жараённи ўз ичига олган яна бир йўналиш – Медиаменежментга 25 нафар абитуриент талабаликка қабул қилинади.

Медиа маданият, медиа сиёсат, медиа иқтисодиёт, қолаверса, ягона ахборот майдонини яратиш бўйича янги лойиҳалар ва бугунги глобаллашув жараёнида қатор ислоҳотларни амалга ошириш имкони яратилди.

Ушбу йўналишлар, айнан, Ўзбекистон журналистика ва оммавий коммуникациялар университетида ўқишни истаган абитуриентлар учун катта янгилик, дея эътироф этилмоқда.

ЎзА