Бош прокуратура ҳузуридаги Иқтисодий жиноятларга қарши курашиш департаментнинг Тошкент шаҳри ва Хоразм вилояти бўлинмалари ҳамкорлигида тезкор текширув тадбирлари ўтказилди.

Тошкент шаҳри Сергели туман бўлими томонидан ўтказилган терговга қадар текширувда, хоразмлик фуқаролар К.С. ва Ф.Т. олдиндан тил бириктириб, фуқаро С.га тадбиркорлик фаолияти учун 2 дона “Malibu”, 1 дона “Lacetti Gentra” русумли автотранспорт воситаси ва тилла буюмлар олиб беришни ваъда қилиб, унинг 60 700 АҚШ долларини фирибгарлик йўли билан қўлга киритганликлари аниқланган.

Худди шундай, Департаментнинг Хоразм вилояти Хонқа туман бўлими томонидан ўтказилган терговга қадар текширувда, фуқаро Н.С. фуқароларнинг ишончига кириб, 2019-2020 йилларда уларнинг “Malibu”, “Largus” ва “Cobalt” русумли автотранспорт воситаларини кейинчалик янгисини олиб бериш ёки пулини бериш шарти билан қўлга киритиб, шу кунга қадар 4 нафар фуқаронинг 764,4 миллион сўм қийматдаги мулкларини фирибгарлик йўли билан қўлга киритганлиги аниқланган.

Мазкур ҳолатлар юзасидан Жиноят Кодексининг 168-моддаси (фирибгарлик) билан жиноят ишлари қўзғатилиб, тергов ҳаракатлари ўтказилмоқда.