Яқинда “Ўзэнергоинспекция” ходимлари Олмалиқ кон-металлургия комбинатида бўлиб, бу ердаги “Туккет” подстанциясининг фаолияти билан танишган эди. Бу сафар эса улар “Тоshelektroapparat” масъулияти чекланган жамияти хорижий корхонасининг иш жараёнларини ўрганди.

“Ўзэнергоинспекция” бошқарма бошлиғи ўринбосари Шодибек Умрзоқов бу ҳақда қуйидагиларни маълум қилди:  

– Бугунги кунда инспекция томонидан нафақат табиий газ ва электр энергиясини назардан ўтказиш, балки мамлакатимиздаги корхоналар фаолияти билан яқиндан танишишга эътибор берилмоқда. Бу эса бевосита улардаги иш жараёнининг ташкил этилиши, шу билан бирга, электр қурилмаларидан фойдаланиш тартибларини ҳам ўрганишга қаратилган.  

Бу сафар биз Тошкент шаҳридаги “Тоshelektroapparat” масъулияти чекланган жамиятида бўлиб, мазкур корхона ишини ўргандик. Ташкилот масъуллари томонидан иштирокчилар учун семинар ташкил этилди. Унда корхонага қарашли “Ўзэлектроаппарат-Electroshield” АЖ ва “MDM” ДУКнинг ишлаб чиқариш жараёнлари билан атрофлича таништирилди.  

Тадбирда мазкур корхоналардаги электротехника маҳсулотларини ишлаб чиқариш жараёнлари, шунингдек, металлни қайта ишлаш, электрокоплама ва паст ҳамда юқори вольтли электр жиҳозларини ишлаб чиқариш технологияларига жиддий эътибор берилди.  

Таъкидлаш керакки, бугунги кунда электротехника саноатида янги ва замонавий технологияларни ишлаб чиқаришга жорий этиш муҳим аҳамиятга эга. Шундай технологиялар орқали маҳсулотлар сифати ошади, ишлаб чиқариш жараёнларининг самарадорлиги юқори бўлади.  

Умуман олганда, Ўзбекистон электроника саноати ўсиш ва ривожланиш жараёнида муҳим қадамларни босиб ўтмоқда. Мамлакатда турли электрон маҳсулотлар ишлаб чиқариш ва инновацион технологиялар билан боғлиқ ишланмаларга алоҳида эътибор қаратиляпти. Соҳага қаратилган давлат дастурлари ва қўллаб-қувватлаш чоралари ҳам ишлаб чиқариш салоҳиятини кучайтиришга ёрдам беряпти. Юртимизнинг электроника тармоғидаги ривожи, нафақат ички бозорни таъминлаш, балки экспорт имкониятларини кенгайтиришга ҳам хизмат қилмоқда.  

Н.Зиёдуллаева,  

ЎзА