Жорий йилнинг сентябрь ойида 911 та ҳолатда истеъмолчилар томонидан табиий газ ва электр энергиясидан ноқонуний фойдаланиш ҳолатлари аниқланган.

“Ўзэнергоинспекция” матбуот хизматига кўра, назорат тадбирларида 94 миллион 533 минг метр куб табиий газ ва 42 миллион 961 минг киловатт соат электр энергияси талон-торож қилинган. Бу ҳолатлар тизимга 111 миллиард 428 миллион сўм зарар келтирган.

– Ноқонуний фойдаланишнинг энг кўп ҳолатлари Самарқанд, Фарғона ва Тошкент вилоятларига тўғри келади, – деди “Ўзэнергоинспекция” матбуот хизмати раҳбари Наврўз Норбобоев. – Маълумот ўрнида айтиш керакки, бу ҳажмдаги табиий газ ҳозирги кунда 472 минг 665 та хонадоннинг, электр энергияси эса 214 минг 805 та хонадоннинг бир ойлик истеъмолига тўғри келади. Айни чоғда қоидабузар истеъмолчиларга нисбатан белгиланган тартибда чоралар кўрилиб, тегишли ҳужжатлар ҳуқуқни муҳофаза этувчи органларга тақдим қилинган. Давлат ва халқимиз мулки бўлган бу манбаларни қонуний ва тежамкорлик билан ишлатиш барчамизнинг бурчимиз. Шу сабабли, Энергетика вазирлиги ва тегишли ташкилотлар ҳамкорлигида ўтказилаётган назорат тадбирлари айни шу мақсадга қаратилган.

Н.Зиёдуллаева, ЎзА