“Ўзбекнефтгаз” АЖ раҳбарияти “Abu Dhabi Commercial Bank” (ADCB) вакиллари билан учрашув ўтказди. Бу ҳақда жамият ахборот хизмати хабар берди.

Мулоқот давомида компанияда олиб борилаётган трансформация жараёнлари, молиявий барқарорликни мустаҳкамлашга қаратилган чора-тадбирлар, шунингдек, янги инвестиция лойиҳаларининг амалга оширилиши ва амалдаги ҳамкорлик натижалари юзасидан фикр алмашилди.

Учрашувда банк вакиллари 2026 йилда жамият фаолиятини молиялаштириш кўламини янада кенгайтиришга тайёр эканликларини таъкидлади.

Қайд этилганидек, томонлар ўртасидаги ҳамкорлик бугунги кунда клуб кредити, синдикатлаштирилган кредитлар жалб қилиш ҳамда еврооблигациялар чиқариш каби молиявий механизмлар асносида изчил ривожланиб бормоқда.

Музокаралар якунида тарафлар ўзаро шерикликни янада чуқурлаштириш ва янги йўналишлар бўйича ҳамкорликни кенгайтиришдан манфаатдор эканликларини билдирди.

Н.Зиёдуллаева тайёрлади, ЎзА