2025 йил бошидан Ўзбекистонда озиқ-овқат экспорти 37 фоизга ошиб, 3 миллиард долларга етди. Экспорт географияси ҳам сезиларли равишда кенгайди. Жорий йилда Швецияга илк бор маҳаллий қовунлар етказилган бўлса, Буюк Британияга полиз экинлари ва узум экспорт қилиниб, энг гавжум кўчаларда сотилди. Кувайтга ҳам рекорд даражада илк бор 23 тонна майиз жўнатилди.

Хитой аҳолиси Ўзбекистон мошини севиб истеъмол қилади. Улар учун юртимиз маҳсулотлари ишончли сифат белгисига тенг. Жанубий Кореяда ҳам шундай натижаларга эришилмоқда.  

-Жорий йилда Жанубий Кореяда анор экспорти 10 баробарга ошди, - дейди Ўсимликлар карантини ва ҳимояси агентлиги Марказий экспорт штаби ходими Гўзал Ғуломова. - Бунда Ўсимликлар карантини ва ҳимояси агентлиги томонидан мазкур давлатда ўтказилган кўргазмаларнинг аҳамияти катта бўлди. Тадбир доирасида йирик савдо тармоқлар билан ўтказилган музокаралар натижасида савдо тармоқларининг бирида миллий стенд ташкил этилиб, маҳсулотларимиз сотуви йўлга қўйилди. Шундай қилиб Ўзбекистон Жанубий Корея бозорида бундай натижага эришган биринчи давлат бўлди.  

Жорий йилда Швецияга илк бор маҳаллий қовунлар етказилди. Мазкур полиз маҳсулоти Буюк Британияда ҳам муваффақиятли сотилди. Шу билан бирга бир неча навдаги сархил узумлар Японияга экспорт қилинди.  

Умуман олганда, 2025 йил мамлакатимиз мева-сабзавотлари экспорти учун омадли келди.  Экспорт харитасида Жанубий Корея, Япония, Европа Иттифоқи давлатлари, Форс кўрфази мамлакатларига жўнатмалар ҳажми кескин ошган.  

Қишлоқ хўжалиги маҳсулотлари экспорти ривожланишда давом этмоқда. Йил якунига қадар кўрсаткичлар 3,2 миллиард доллардан ошиши кутилмоқда. Бунда албатта янгича ёндашув, илғор технологиялар, ҳамкор давлатлар бозорларининг коньюктураси таҳлили, улардаги нархлар мониторингининг ўрни катта.  

<iframe width="640" height="420" src="https://www.youtube.com/embed/oaf9CDXgeoA" title="O‘zbekistonning oziq-ovqat eksporti 37 foizga oshdi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Санжар Тошпўлатов, Улуғбек Тўхтаев (видео), ЎзА